Ўзбекистон ва Малайзия олтин қазиб олиш бўйича ҳамкорлик қилади
Малайзия томони Ўзбекистоннинг кон-металлургия саноатидаги, айниқса, олтин қазиб олишдаги улкан тажрибасидан келиб чиқиб, кончилик соҳасида лойиҳаларни ишлаб чиқиш ва ўзаро тажриба алмашиш истагини билдирди
Ўзбекистоннинг Куала-Лумпурдаги элчихонаси вакиллари ва Малайзиянинг Паханг штати Администрацияси Инвестициялар ва хусусийлаштириш бошқармаси бошлиғи Ҳаслина бинти Баҳасан ўртасида онлайн-мулоқот бўлиб ўтди, деб хабар берди «Дунё» АА.
Маълумот учун, мазкур штат пальма ёғи ва каучук маҳсулотининг энг йирик экспортчиси, шунингдек, ҳудудда сабзавот ва гуруч етиштирилади. Саноат, асосан, қишлоқ хўжалиги хом-ашёсини жумладан, пальма ёғи, каучук, ёғочни қайта ишлаш, шунингдек, нефть-кимё ва олтин қазиб олишга ихтисослашган.
Шунингдек, Паханг штати Малайзиянинг шарқий соҳилидаги (East Coast Economic Region) махсус иқтисодий зонанинг транспорт ва саноат маркази ҳисобланади. Автомобилсозлик саноати ривожланган. Штатда DRB-HICOM, DefTech, Isuzu, Mercedes-Benz, Volkswagen ва Suzuki каби компаниялар фаолият юритади. Шунингдек, мазкур ҳудудда интеграциялашган нефть-кимё мажмуаси, Малайзия-Хитой саноат парки, «Паханг» технопарки ва «Гамбанг» ҳалол парки жойлашган.
Мавзуга доир: Депозитлар ўрнига қорамол, олтин ва машина: ўзбекистонликлар ўз жамғармаларини қандай сақлайди?
Учрашувда томонлар ўртасида ўзаро иқтисодий ҳамкорлик масалалари муҳокама қилинди. Хусусан, Малайзия томони Ўзбекистоннинг кон-металлургия саноатидаги, айниқса, олтин қазиб олишдаги улкан тажрибасидан келиб чиқиб, кончилик соҳасида лойиҳаларни ишлаб чиқиш ва ўзаро тажриба алмашиш истагини билдирди.
Шунингдек, Паханг штати вакили ипакчилик соҳасида ҳамкорлик қилишдан ўзаро манфаатдорлигини билдирди.
Музокаралар натижасида Паханг штати ва мамлакатимизнинг тармоқ вазирлик ва идоралари ўртасида ҳамкорлик истиқболларини муҳокама қилиш бўйича онлайн-тадбир ўтказишга келишилди.
Эслатиб ўтамиз, Ўзбекистон Марказий банки 2022 йилда олтин захираларини 34 тоннага оширгани ҳақида хабар берилганди.
Жаҳон олтин кенгаши World Gold Council (WGC) маълумотларига кўра, Марказий банк 2022 йилни олтин сотувчиси сифатида бошлаган ва уни харидор сифатида якунлаган. Марказий Осиё мамлакатлари орасида Қирғизистон (6 тонна) ва Тожикистон (4 тонна) асосий харидорга айланган. IV чоракда турли мамлакатлар Марказий банклари томонидан олтинни соф харид қилиш ҳажми 417 тоннани, иккинчи ярим йилликда жами харидлар эса 862 тоннани ташкил этди.
Қозоғистон 2022 йили энг кўп олтин сотувчи бўлди: мамлакат қимматбаҳо метал захираларини 51 тоннага камайтириб, 352 тоннани (умумий заҳиранинг 58 фоизи) ташкил этди.