Қоҳирада Ўзбекистон дипломатлари Миср Ишбилармонлар уюшмаси ижрочи директори Муҳаммад Юсуф билан музокаралар ўтказди. «Дунё» ахборот агентлигининг хабар беришича, учрашувда икки мамлакат бизнес вакиллари ўртасида ўзаро ҳамкорлик алоқаларини янада ривожлантириш ва кенгайтириш иқтиқболлари муҳокама этилган.

Қайд этилишича, икки мамлакат тадбиркорлари ўртасидаги ҳамкорлик алоқаларини янада кенгайтириш мақсадида Ўзбекистон ва Миср ишбилармонлари бизнес кенгашини тузиш таклифи билдирилди. Дастлабки босқичда Миср томони фармацевтика ва тўқимачилик соҳаларида ўзаро ҳамкорликни йўлга қўйиш зарурлигини қайд этди.

Бундан ташқари, томонлар ўртасида эҳтиёж юқори бўлган қишлоқ хўжалиги маҳсулотлари — цитрус мевалар, заъфарон ва қуруқ мевалар савдосини ташкил этишга ҳам алоҳида эътибор қаратди.

Музокаралар якунида Ўзбекистон ва Миср ишбилармонлари ўртасида делегациялар алмашувини кўпайтириш, тадбиркорлар ўртасида музокаралар ташкил этиш, икки мамлакатда бўлиб ўтадиган кўргазма ва ярмаркаларда бизнес вакилларининг иштирокини таъминлашга келишиб олинди.

Маълумот учун, Миср Ишбилармонлар уюшмаси 1979 йилда ташкил этилган бўлиб, хорижий давлат ишбилармон доиралари вакиллари, хусусан, Австрия, Греция, Венгрия, Иордания, Жанубий Корея, Руминия, Таиланд, Тунис, Туркия, Украина Ишбилармонлар кенгаши ҳамда Африка давлатлари ва Хитой билан қўшма қўмитани ташкил этган.