Ўзбекистонда 2021 йилда вакцинация учун 224 миллион доллар маблағ ажратилди. Бу ҳақда Иқтисодий тараққиёт ва камбағалликни қисқартириш вазири Жамшид Қўчқоров маълум қилди.

Олий Мажлис Қонунчилик палатасининг 26 январь куни бўлиб ўтган мажлисида Иқтисодий тараққиёт ва камбағалликни қисқартириш вазири Жамшид Қўчқоров 2021 йилги Давлат дастури ижроси юзасидан ҳисобот берар экан, ижтимоий соҳа харажатларига алоҳида тўхталиб ўтган.

Вазирнинг таъкидлашича, 2021 йилда коронавирус пандемиясининг олдини олиш мақсадида вакцинация ишлари учун давлат бюджетидан 224 миллион доллар маблағ ажратилган.

Бундан ташқари, вазир аҳолини уй-жой билан таъминлаш борасидаги саъй-ҳаракатларга ҳам тўхталиб, ўтган йилда 14 минг 670 та хонадон ўз эгаларига топширилганини таъкидлаган. 6 минг фуқарога 1,1 триллион сўм миқдорида субсидиялар ажратилгани қўшимча қилинган.

Аввалроқ Президент иқтисодий комплекс раҳбарларига бир қанча вазифалар топширгани хабар қилинганди.