Ўзбекистонда бензин нархи 10–15 кун ичида ўзгаради. Бу ҳақда АОКАда ўтказилган матбуот анжуманида Монополияга қарши курашиш қўмитаси раиси ўринбосари Фаррух Қорабоев маълум қилди.

Хабар қилинишича, бензин нархларига таъсир қилувчи омиллар ўрганилган, кўрсатмалар берилган, чоралар кўриляпти. Бу бўйича идоралараро ишчи гуруҳ ишлаяпти.

«Қаерда бозор механизмлари асосида табиий ўсишга эришилган бўлса, биз унга таъсир кўрсата олмаймиз. Лекин сунъий равишда юзага келтирилган, келишиб қилинган, манипуляция ҳаракатларига таъсир кўрсатиш мумкин», — дея таъкидлаган Фаррух Қорабоев.

Қайд этилишича, бензин нархи ошишида ҳам манипуляция ҳолатлари, арзон нархдаги бензинни сунъий равишда аннуляция қилиш аломатлари аниқланган. Бунга албатта керакли чоралар кўрилиши хабарда таъкидланган.

Шунингдек, бензин нархини барқарорлаштириш, тушириш бўйича ҳаракатлар давом этмоқда ва бу вақт талаб қиладиган масала. Лекин яқин кунларда нархларда ўзгариш бўлиши кутилмоқда. Айни пайтда бозорни тўйинтириш, арзон нархлар асосида кичик харидорларга имконият бериш масаласига эътибор қаратилаётгани маълум қилинди.

Бунинг сабаби сифатида йирик, улгуржи харидорлар жуда кичик рентабелликка ишлаши, уларнинг савдо жараёнида баландроқ таклиф бериш имкони кўплиги келтирилган. Айни сабабга кўра, лотлар кичик ҳажмда қилинмоқда. Бундан мақсад — оддий АЁҚШларнинг бензинни олиши ва захирасини тўлдиришига имконият яратишдан иборат. Бу нархлар сунъий равишда кўтарилишининг олдини олишга ёрдам бериши қайд этилган.

Аввалроқ Ўзбекистонда Аи-80 маркали бензиндан воз кечилиши хабар қилинганди. Шунингдек, Ўзбекистонда бензин нархи нега қимматлиги ҳақида хабар берилди.