Ўзбекистонда ишбилармонлик фаоллиги индекси бўйича қайси вилоят етакчилиги маълум бўлди
Кичик ва ўрта бизнеснинг ишбилармонлик фаоллиги энг юқори кўрсаткичларга эришиш тенденциясини намоён этмоқда.
Иқтисодий тадқиқотлар ва ислоҳотлар маркази томонидан баҳоланган Ишбилармонлик фаоллиги индекси (ИФИ) бўйича энг юқори ўсиш суръати Жиззах вилоятида қайд этилган.
2021 йил ноябрь ойида Ишбилармонлик фаоллиги индекси бўйича 13 та ҳудудда октябрь ойига нисбатан ўсиш кузатилган. Жиззах (44,3 фоиз), Бухоро (43,7 фоиз), Сурхондарё (42,6 фоиз), Андижон (40,0 фоиз), Самарқанд (39,1 фоиз) вилоятлари ва Қорақалпоғистон Республикасида (41,2 фоиз) кўрсаткич сезиларли даражада юқорилаган.
Шу билан бирга Қашқадарё (–2,2 фоиз) вилоятида ўтган ойга нисбатан пасайиш кузатилган.
Қайд этилишича, Ўзбекистонда ИФИ 2021 йил ноябрь ойида 1034 бирликни ташкил этиб, октябрь ойига нисбатан 3,4 фоизга ошган. Мамлакатда ИФИ бўйича 2020 йилнинг мос даврига нисбатан 27 фоизлик ўсиш қайд этилган. Ушбу тенденция қуйидаги компонентлар даражасидаги ўзгаришларга боғлиқ бўлган:
- хўжалик юритувчи субъектларнинг банк ҳисобварақаларидаги опреациялар сони 6,2 фоизга ошган;
- фаолият кўрсатаётган хўжалик юритувчи субъектлар бўйича компонент 2,0 фоизга камайган;
- товар-хом ашё биржасида хом ашё сотиб олиш жадаллиги 4,9 фоизга ошган;
- товар белгилари бўйича компонент 10,6 фоизга сезиларли даражада ошган.