Ўзбекистонда кўп қаватли уйлар қурилиши бўйича 47 та мансабдор шахсга нисбатан чора кўрилиши маълум бўлди. Бу ҳақда Миллий ахборот агентлиги хабар берди.

Маълум қилинишича, Ўзбекистон Президенти Администрацияси ҳузуридаги Ахборот ва оммавий коммуникациялар агентлигида Қурилиш вазирлиги томонидан матбуот анжумани ташкил этилган.

Қайд этилишича, 2021 йилда республикада ипотека дастури асосида 207 та массивда 1075 та кўп қаватли уйлар қурилиши олиб борилмоқда. Шунингдек, жами хонадонлар сони 45,5 мингни ташкил этмоқда.

Таъкидланишича, уйларнинг қурилиш-монтаж ишлари сифати юзасидан Қурилиш соҳасида назорат инспекциялари томонидан назорат ўрнатилган. Қурилишда аниқланган камчиликларни бартараф этиш бўйича жами 2880 та ёзма кўрсатмалар берилган. Уйлар қурилишида 52 та ҳолат бўйича жами 2 миллиард 783 миллион сўмлик сифатсиз бажарилган ишлар ҳажми чегириб қолинган.

Шунингдек, 47 та мансабдор шахсга нисбатан чора кўриш учун ҳужжатлар тайёрланиб, судларга юборилган. Қолаверса, қурилиш-монтаж ишлари сифатсиз бажарилган 12 та объектда ишлар вақтинча тўхтатилган. Объектларда сифатсиз материал ва буюмлардан фойдаланилганлик учун тегишли ташкилотларга 26 та тақдимнома киритилган.

Аввалроқ Ўзбекистонда мансабдор шахсларнинг жиноятлари давлат ва жамиятга қанча зарар етказгани очиқлангани хабар қилинганди.