Ўзбекистондаги янги лизинг битимлари ҳажми 2020 йилда деярли 30 фоизга қисқарди. Бу ҳақда Тошкентда ўтказилган МДҲ давлатларининг II Ҳалқаро банк-молия форумида бош вазир ўринбосари — иқтисодий тараққиёт ва камбағалликни қисқартириш вазири Жамшид Қўчқоров маълумот берди.

Вазирнинг таъкидлашича, иқтисодиётнинг бошқа тармоқлари каби лизинг соҳаси ҳам пандемиянинг қаттиқ салбий таъсирига учраган.

«2020 йил якуни бўйича дунё лизинг бозори ҳажми 2019 йил билан солиштирилганда 15 фоизга қисқарди. Ўзбекистонда ҳам мазкур йўналишда кескин пасайиш кузатилиб, янги лизинг битимлари ҳажми деярли 30 фоизга қисқарган», — деган Жамшид Қўчқоров.

Қайд этилишича, бунга биринчи навбатда лизинг олувчиларнинг фаолияти пандемия даврида чекловлар туфайли тўхтаб қолгани сабаб бўлган. Лекин давлат томонидан қабул қилинган инқирозга қарши чоралар — банк кредитларини кечиктириш, солиқ таътиллари орқали 2020 йил охирига келиб лизинг қабул қилувчиларнинг фаолиятини мувозанатга келтиришга эришилган.

Натижада кечикишлар кўрсаткичи пандемиягача бўлган даврдаги кўрсаткичлар даражасига қайтмоқда. Вазир шу сабабли 2021 йилги кўрсаткичлар 2019 йилгидан яхшироқ бўлиши кутилаётганини айтган.

Жамшид Қўчқоров форумда, бундан ташқари, пандемия даврида молиявий технологиялар соҳасида кескин ривожланиш кузатилганини, молиявий технологик компаниялар таъсири остида тижорат банклари рақамли технологиялар соҳасига тезроқ кириб келаётганини қайд этган. Шунингдек, рақамли молиявий хизматларнинг ривожланиши катта ташкилий чораларни ва махсус технологияларни жорий қилишни талаб қилиши айтилган.

Маълумот учун, лизинг — узоқ муддатли ижара бўлиб, унинг охирида ижарага олинган объект ижарачи (фойдаланувчи) тасаруфида қолиши мумкин.