Ўзбекистонда ёш тадбиркорларга 540 миллион сўмгача кредитлар ажратилади. Ҳукуматнинг «Ёшларни тадбиркорликка жалб этиш ва уларнинг бизнес ташаббусларини қўллаб-қувватлаш бўйича қўшимча чора-тадбирлар тўғрисида»ги қарори қабул қилинди.

Президентнинг 2021 йил 13 июлдаги фармонига асосан Тикланиш ва тараққиёт жамғармаси томонидан ТИФ Миллий банкка 100 миллион доллар пул ажратилган.

Қарорга асосан, мазкур маблағлардан 2022-2024 йилларда ёш тадбиркорларнинг янги бизнес лойиҳалари учун кредитлар қуйидаги шартларда ажратилади:

• кредит миқдори БҲМнинг 1000 бараваридан 2 минг бараваригача;
• муддати — 7 йил, имтиёзли давр – 3 йил;
• фоиз ставкаси — Марказий банкнинг асосий ставкасида (ҳозирда 14 фоиз).

Кредитлар ажратиш учун Ёшлар ишлари агентлиги, Савдо саноат  палатаси ва банклар томонидан тадбиркорлик билан шуғулланиш истагидаги ёшлар рўйхати шакллантирилади.

Ёшлар ўртасида бизнес кўникмаларини шакллантириш ва тадбиркорликка ўқитиш бўйича ўқув амалий курслари, шу жумладан «онлайн» тарзда бепул ташкил этилади. Мазкур курсларни муваффақиятли тугатган ёшларга сертификат тақдим этилиб, улар томонидан ўз бизнесини ташкил этиш учун юқоридаги шартларда кредитлар ажратилади.

Лойиҳани амалга ошириш учун ёшлар ТИФ миллий банк филлиалларига ариза беради ва унга мувофиқ кредит ажратилади ёки асослантирилган ҳолда рад этилади.