Ўзбекистондаги SEG компанияси БАА ҳолдинги билан қўшма корхона ташкил қилади
Ҳаб жаҳон бозорида Ўзбекистоннинг озиқ-овқат маҳсулотлари савдосини кенгайтириши ва Марказий Осиёнинг озиқ-овқат хавфсизлигини таъминлаши кутилмоқда.
Бирлашган Араб Амирликларининг AD Ports Group ҳолдинги ва Ўзбекистоннинг Sanoat Energetika Guruhi компанияси (SEG) логистика соҳасида қўшма корхона ташкил этилишини эълон қилди. Бу ҳақда араб компанияси матбуот хизмати хабар бермоқда.
Янги ташкилот логистика ва экспедиторлик хизматларини, жумладан юкларни интермодал ташиш ва бошқа қатор ишларни бажаради.
Корхона Ўзбекистоннинг географик жойлашуви билан боғлиқ муаммоларни ҳал қилиш учун янги технологиялар ва ихтисослаштирилган жараёнларни жорий этиш билан шуғулланади.
Томонлар, шунингдек, интеграциялашган озиқ-овқат маҳсулотларини сақлаш ва тарқатиш марказини ривожлантириш бўйича ўзаро англашув меморандумини имзолади.
Ҳаб жаҳон бозорида Ўзбекистоннинг озиқ-овқат маҳсулотлари савдосини кенгайтириши ва Марказий Осиёнинг озиқ-овқат хавфсизлигини таъминлаши кутилмоқда.
Марказ Самарқанд халқаро аэропорти яқинида жойлашади. У SEG шўба корхонаси — Marakand Logair томонидан бошқарилади.
Sanoat Energetika Guruhi ҳақида
Sanoat Energetika Guruhi МЧЖ ХК Ўзбекистондаги энг йирик хусусий вертикал интеграциялашган нефть ва газ компанияси ҳисобланади. Айни пайтда компания ер қаъридан фойдаланиш ҳуқуқига эга бўлган 103 та конга эгалик қилади ва нефть қазиб олишнинг тахминан 80 фоизини ва тасдиқланган газ захираларининг тахминан 22 фоизини ташкил қилади.
Sanoat Energetika Guruhi Кипр офшор зонасида рўйхатдан ўтган Belvor Holding Limited (собиқ Jizzakh Petroleum) компаниясига қарашли. Корхона раҳбари Шокир Файзуллаев бўлиб, у аввал «Ўзбекнефтгаз» акциядорлик жамияти раиси ва иқтисодиёт вазири ўринбосари лавозимларида ишлаб келган.
Нефть ва газ қазиб олишдан ташқари, компания бензин, дизел, нефть, авиация керосини ва бошқа бир қатор юқори қўшилган қийматга эга маҳсулотлар ишлаб чиқаради. Корхона Ўзбекистондаги стратегик лойиҳаларда, жумладан, нефть қазиб олишни кўпайтириш лойиҳаларида иштирок этади.
Аввалроқ Sanoat Energetika Guruhi МЧЖ ХК Фарғона нефтни қайта ишлаш заводини 100 миллион долларга сотиб олганди.
Кейинчалик корхонага қимматли қоғозлар бозорида инвестиция активларининг ишончли бошқарувчиси сифатида лицензия берилди.
