Ўзбекистондан Европа Иттифоқи (ЕИ) давлатларига экспорт 2022 йилнинг дастлабки беш ойида 86 фоизга ошди. Бу ҳақда инвестициялар ва ташқи савдо вазири Сардор Умурзоқов ва Европа Кенгаши президентининг ташқи сиёсат бўйича бош маслаҳатчиси Саймоном Мордюнинг Брюсселдаги учрашувида маълум қилинди.

Қайд этилишича, 2022 йилнинг дастлабки беш ойида Ўзбекистон ва ЕИ мамлакатлари ўртасидаги товар айланмаси 22 фоизга, Ўзбекистондан ЕИга экспорт эса 86 фоизга ошган.

Энг катта ўсишни кўрсатган товарлар тоифалари орасида кимё саноати маҳсулотлари (6 марта ўсиш), тўқимачилик (90 фоизга ўсиш) ва озиқ-овқат маҳсулотлари (65 фоизга ўсиш) бор. 

«Бунга кўп жиҳатдан Ўзбекистон томонидан 2021 йилда Европа Иттифоқининг GSP+ Преференциялар бош тизимининг бенефициар мақомини олиши туфайли эришилди», дейилади ИТСВ хабарида.

Фурсатдан фойдаланиб, томонлар GSP+ тизими доирасида ЕИ мониторинг миссиясининг Ўзбекистонга ташрифи якунларини муҳокама қилган ва ушбу тизимнинг бенефициари сифатида унинг афзалликларини амалда қўллаш мақсадида мамлакат томонидан ратификация қилинган барча 27 халқаро конвенция талабларига риоя этилишини таъминлаш бўйича навбатдаги тадбирларни белгилаб олган.

Аввалроқ Европа Иттифоқининг GSP+ Преференциялар бош тизими бенефициари мақоми туфайли Ўзбекистон маҳсулотларини Европа бозорига экспорт қилиш ҳажми 56 фоизга ошгани ҳақида хабар берилганди.