Ўзбекистонга пиротехника воситалари олиб кириш учун кимларга рухсат берилиши маълум бўлди
Ҳукуматнинг пиротехника буюмлари муомаласига оид қарори қабул қилинди
Ўзбекистонда ҳукумат қарорига мувофиқ пиротехника воситаларининг фақатгина лицензияга эга юридик шахслар томонидан олиб кирилишига рухсат берилади. Бу ҳақда Адлия вазирлигининг Huquqiy axborot канали хабар берди.
Маълум қилинишича, ҳукуматнинг 1 декабрдаги «Ўзбекистон Республикаси ҳудудида пиротехника буюмлари муомаласи соҳасида давлат назоратини кучайтиришга доир чора-тадбирлар тўғрисида»ги қарори қабул қилинган.
Қарорга мувофиқ, хавфлиликнинг II классига тегишли маиший пиротехника буюмларининг жисмоний ва юридик шахслар томонидан муомаласи тақиқланади. Шу билан бирга, техник ва махсус мақсаддаги пиротехника буюмлари Президент ёки ҳукумат қарорларига мувофиқ оммавий тадбирларда лицензияга эга юридик шахслар томонидан олиб кирилиши мумкин.
Қайд этилишича, пиротехника буюмларининг ноқонуний муомаласи билан шуғулланганларни аниқлаш ва жавобгарликка тортиш бўйича комплекс чоралар кўрилади.
Аввалроқ Ўзбекистонда ипотека кредити олишда қариндош бўлмаган шахслар кафил бўлишига рухсат берилгани хабар қилинганди.
