Ўзбекистоннинг Урганч ва Нукус шаҳарлари аэропортларда кучли туман туфайли парвозлар кечиктирилди. Бу ҳақда Uzbekistan Airports матбуот хизмати хабар берди.

Маълум қилинишича, 3 декабрь тунида Урганч ва Нукус аэропортларида ёмон об-ҳаво натижасида кўриш имконияти ёмонлашгани муносабати билан самолётлар учиш ва қўнишни амалга ошира олмаган.

Қайд этилишича, қуюқ туман туфайли Урганч аэропортида кўриш имконияти 200 метрни ташкил этган. Москвадан AFL-1976 қатновини бажараётган самолёт соат 03:25да Шереметьево аэропортидан уча олмаган.

Худди шундай ҳолат яна иккита қатновда кузатилган. Жумладан, соат 04:35 даги SBI6481 Самара–Урганч қатнови ҳамда соат 03:30 даги SVR2473 қатнови Санкт-Петербургдан учиб кета олмаган. Самолётлар об-ҳаво шароити яхшилангунга қадар Урганч учиш аэропортида қолмоқда.

Шунингдек, кўриш масофаси 200 метр бўлган қуюқ туман Нукус аэропорти фаолиятини ҳам чеклаган. HY15/16 ва HY11/12 қатновлари Тошкент аэропортида учишни кутмоқда. Соат 11:30 да Нукус–Актау йўналиши бўйича учишни амалга ошириши керак бўлган HY9727/9728 қатнови парвозининг чекланиши ҳам мустасно эмаслиги хабарда таъкидланган.

Аввалроқ Uzbekistan Airways Янги йил муносабати билан Дубайга қўшимча қатновларни йўлга қўйгани хабар қилинганди. Шунингдек, Uzbekistan Airways Намангандан Россиянинг 8 та шаҳрига парвозларни йўлга қўйиши ҳақида хабар берилди.