Президент тадбиркорларнинг 2 трлн сўмлик қарзларидан бутунлай воз кечишни таклиф қилди
Шавкат Мирзиёев тадбиркорлар билан учрашув давомида бўш бино, фойдаланилмаётган ер участкасига нисбатан мол-мулк ва ер солиқларининг оширилган ставкаларини қўллаш бўйича аввал ошириб ҳисобланган 2 трлн сўмлик солиқ қарзларидан воз кечишни таклиф қилди.
Шавкат Мирзиёев 22 август куни тадбиркорлар билан учрашувда уларнинг бўш бино, фойдаланилмаётган ер участкасига нисбатан мол-мулк ва ер солиқларининг оширилган ставкаларини қўллаш бўйича аввал ошириб ҳисобланган 2 трлн сўмлик солиқ қарзларидан воз кечишни таклиф қилди. Бу ҳақда Президент матбуот хизмати хабар берди.
Маълум бўлишича, 2022 йил 1 июлдан бошлаб бўш бино, фойдаланилмаётган ер участкасига нисбатан мол-мулк ва ер солиқларининг оширилган ставкаларини қўллаш бекор қилинган. Лекин 19 минг нафар тадбиркорда бундан аввал ошириб ҳисобланган солиқлар бўйича қарздорлик бўлган. Таъкидланишича, мазкур масала юзасидан кўплаб мурожаатлар ҳам келиб тушган.
«Шуларни инобатга олиб, тадбиркорларнинг оширилган солиқ ставкалари бўйича ҳисобланган 2 триллион сўмлик қарзларидан бутунлай воз кечсак, нима дейсизлар?», — деб тадбиркорларга мурожаат қилган Президент.
Аввалроқ Шавкат Мирзиёев корхоналарни микро, кичик ва ўрта бизнес тоифаларига ажратиш ташаббусини билдирганди.
Микро бизнес эгалари ихтиёрий равишда йилига 20-30 миллион сўм тўласа, бухгалтерия ҳисобини юритиш ва солиқ идораларига тақдим этиш мажбуриятидан озод қилинади.
Шунингдек, давлат раҳбари айланмаси 1 миллиард сўмдан ошган корхоналар фойда солиғини 2 баравар кам тўлашини маълум қилди.