Қозоғистон бизнесининг тартибсизликлар туфайли кўрган зарари қарийб 87,2 миллиард тенгени (тахминан 198 миллион доллар) ташкил этди, шундан 85,8 миллиард тенге Олмаота шаҳрига тўғри келди. Бу ҳақда «Атамекен» Қозоғистон Миллий тадбиркорлар палатасига таяниб хабар берди.

Қайд этилишича, 7 январь куни кечқурун республиканинг ўнта ҳудудида 848 та тадбиркорлик субъекти ва 1021 та объект, жумладан, Олмаотада 789 та субъект ва 950 та объект зарар кўргани аниқланди. Палата интернет, алоқа ва шаҳарлардаги вазият барқарорлашгани сари рақамлар ортиб бориши ҳақида огоҳлантирди.

Палата раиси Аблай Мирзахметовнинг айтишича, Вазирлар Маҳкамаси билан биргаликда зарарни тиклаш механизмлари ишлаб чиқилмоқда. Улар протседурани иложи борича соддалаштиришга ҳаракат қилишади.

Эслатиб ўтамиз, 2 январь куни Жанаўзенда суюлтирилган газ нархи ошишига қарши намойишлар бошланди. Намойишлар тезда бутун мамлакат бўйлаб тарқалди, норозилар сиёсий талабларни айтишни бошлади. Аммо кейин намойишлар хавфсизлик кучлари билан тўқнашувлар, маъмурий бинолар, банклар ва дўконларга ҳужумлар, талончилик ва ўт қўйишга айланди.

Аввалроқ Қозоғистонда ноқонуний хатти-ҳаракатлар ва сўнгги воқеалар туфайли бизнесга етказилган дастлабки зарар 40 миллиард тенге (91,8 миллион доллар)га баҳоланганди.