Қрим кўпригида портлаш содир бўлди
Россиядаги энг узун кўприкда портлаш юз берди. Kommers.uz Россия учун қурилишига 3,7 млрд доллар сарфланган кўприк ҳақида маълумот беради
Керч бўғози орқали ўтувчи Қрим кўпригининг темир йўл кўпригида 8 октябрь куни эрталаб юк поездида портлаш содир бўлди. Йўл кўпригининг бир қисми қулаб тушган. Кўприк автомобиллар ҳаракати учун бутунлай тўхтатилди.
Kommers.uz Қрим кўприги ҳақида асосий маълумотларни тақдим этади.
Қрим кўприги 2018 йил 15 май куни фойдаланишга топширилган бўлиб Россиядаги энг узун кўприк ҳисобланади. Россия президенти Владимир Путин «КамАЗ»ни бошқарган ҳолда Қрим кўпригининг автомобиллар учун мўлжалланган қисмидан юриб ўтган ва кўприкни расман очиб берган.
«Барчангизни бу тарихий кун билан табриклайман. Чунки, турли даврларда, подшоҳлар даврида ҳам одамлар бу кўприк қурилишини орзу қилишган. Мана ниҳоят бу лойиҳа амалга ошди, мўъжиза рўй берди», – деган Путин кўприкнинг очилиш маросимида.
Кўприкнинг умумий узунлиги 19 километрни ташкил қилади. Унинг қурилиш ишлари 2016 йил февралида бошланган ҳамда 2019 йилда ўз якунига етган. 19 километрлик Қрим кўприги — Россиядаги энг узун кўприкдир. Бош пудратчи «Стройгазмонтаж» лойиҳа қийматини 228,3 миллиард рублга (3,7 миллиард доллар) баҳолаган.
Кўприк бир кунда 40 минг автомобиль ҳамда 47 поезд таркибини ўтказиш қобилиятига эга. Кўприк бўйлаб йилига 14 миллион йўловчи қатнаши ва 13 миллион тонна юк ташилиши мумкин. Шунингдек, кўприкда автомобиллар учун мўлжалланган 4 полосали магистраль йўл билан бир қаторда, икки қаторли темир йўлни ҳам ўз ичига олади.
