Рақамли маркировкаланиши керак бўлган маиший техника турлари белгиланди
CRPT TURON компанияси Asl belgisi маҳсулотларни маркировкалаш тизимининг оператори сифатида белгиланди.
Вазирлар Маҳкамаси қарори билан мажбурий рақамли маркировкаланадиган маиший техника турлари белгиланди. Бу ҳақда Norma хабар берди.
Вазирлар Маҳкамасининг 2022 йил 2 апрелдаги «Маиший техника маҳсулотларини мажбурий рақамли маркировкалаш тизимини жорий этиш тўғрисида»ги қарори қабул қилинди.
Вазирлар Маҳкамасининг «Айрим турдаги маҳсулотларни мажбурий рақамли маркировкалаш тизимини жорий этиш тўғрисида» 2020 йил 20 ноябрдаги қарорига мувофиқ Asl belgisi маҳсулотларни маркировкалаш ва кузатиб бориш миллий ахборот тизимини йўлга қўйиш таъминланган. Бунда CRPT TURON компанияси мазкур тизимнинг оператори сифатида белгиланган.
Ҳужжат билан мажбурий рақамли маркировкалашни бошлаш муддатлари ва маҳсулотлар турлари гуруҳлар бўйича қуйидагича белгиланди:
- биринчи гуруҳ: чангютгич, кир ювиш машинаси, совиткич ва музлаткич, телевизор ва монитор — 2022 йил 15 апрелдан бошлаб;
- иккинчи гуруҳ: маиший газ плитаси, ошхона дудбурони, духовка ва печка, микротўлқинли печ, дазмол, сув иситкич — 2022 йил 1 августдан бошлаб;
- учинчи гуруҳ: сув иситиш қозонлари, кондиционер, ўрнатилган электр моторли маиший техника (сок чиқазгич, блендер, миксер, кофе янчгич, гўшт майдалагич), барча турдаги лампалар — 2022 йил 1 ноябрдан бошлаб.
Шунингдек, қарор билан қуйидагилар тасдиқланди:
- мажбурий рақамли маркировкаланадиган маиший техника маҳсулотларининг идентификация кодлари рўйхати;
- ишлаб чиқарувчи ташкилотлар томонидан маиший техника маҳсулотларини мажбурий рақамли маркировкалаш тизимини босқичма- босқич жорий қилиш графиги;
- импорт қилувчи ташкилотлар томонидан маиший техника маҳсулотларини мажбурий рақамли маркировкалаш тизимини босқичма- босқич жорий қилиш графиги;
- улгуржи ва чакана савдо ташкилотларининг маиший техника маҳсулотларини мажбурий рақамли маркировкалаш тизимига босқичма- босқич ўтиши графиги;
- Маиший техника маҳсулотларини идентификация воситалари орқали рақамли маркировкалаш хусусиятлари тўғрисидаги низом.
Қайд этилишича, оператор томонидан маиший техника маҳсулотларини мажбурий рақамли маркировкалаш учун маркировка кодлари мазкур маҳсулотларни ишлаб чиқарувчиларга ва импорт қилувчиларга тегишли буюртма асосида тақдим этилади.
Ҳужжат қонун ҳужжатлари маълумотлари миллий базасида эълон қилинган ва 2022 йил 2 апрелдан кучга кирди.
Аввалроқ Ўзбекистонда товарларни ҳудуд бўйича идентификациялаш тартиби белгилангани хабар қилинганди. Шунингдек, Ўзбекистонда айрим маҳсулотлар сертификатлаш мажбуриятидан озод қилингани ҳақида хабар берилди.