Россия 2022 йил мудофаа учун Украинадан 4 баробар кўп маблағ ажратгани маълум бўлди
Расмий Киев ҳарбий харажатларни қарийб 800 миллион долларга оширмоқчи.
Украина 2022 йил мудофаа учун 11 миллиард доллар ажратган. Россия эса соҳага қарийб 4 баробар кўп — 46 миллиард доллар йўналтирган.
Украинанинг 2022 йилги давлат бюджетида миллий хавфсизлик ва мудофаа харажатлари 323,138 миллиард гривнани (жорий курс бўйича 11,4 миллиард доллардан ортиқ) ёки ЯИМнинг 6 фоизини ташкил этиши кўзда тутилган.
Россия эса 2022 йилда ҳарбий харажатлар учун 46,3 миллиард доллар ажратган.
Қайд этиш керакки, Украина 2022 йилда Мудофаа вазирлигини молиялаштиришни 22 миллиард гривнага (ҳозирги курс бўйича 777 миллион доллардан кўпроқ) ошириш тўғрисидаги қонун лойиҳасини кўриб чиқмоқда.
Reuters нашрининг ёзишича, Украина 2021 йил мудофаа учун 4,3 миллиард доллар сарфлаган. Россиянинг ўтган йилги ҳарбий харажатлари эса 40 миллиард долларга тенг бўлди.
Аввалроқ Украина сўнгги ойларда Ғарбдан қанча маблағ олгани маълум бўлганди.
