Россия 36 та мамлакат билан авиақатновларга чеклов ўрнатди
Парвозлар фақат махсус рухсатнома билан амалга оширилиши мумкин.
Россия 36 та мамлакат авиакомпанияларининг парвозларига чеклов ўрнатди. Бу ҳақда Федерал ҳаво транспорти агентлиги (Росавиация) хабар берди.
Маълум қилинишича, чекловлар халқаро қонунларга риоя қилиш мақсадида ва Россия авиация саноатига қарши санкцияларга жавоб сифатида киритилган. Аввалроқ Европа Иттифоқи, Буюк Британия ва Канада осмонини Россия самолётлари учун ёпган эди.
Қайд этилишича, Россия ҳаво ҳудуди Европа Иттифоқи мамлакатлари, жумладан Австрия, Болгария, Германия, Греция, Испания, Италия, шунингдек, Буюк Британия ва Канада учун ёпиқ.
«Ушбу мамлакатлардан парвозлар Федерал ҳаво транспорти агентлиги ёки Россия ташқи ишлар вазирлиги томонидан берилган махсус рухсатнома билан амалга оширилиши мумкин», дейилади Росавиация хабарида.
Таъкидлаш керакки, Россиянинг Украинадаги операцияси бошланганидан сўнг бир қанча давлатлар ўз ҳаво ҳудудини Россия самолётлари учун ёпди. Хусусан, буни Буюк Британия, Канада, 27 февралда эса бутун Европа Иттифоқи ушбу чекловни жорий этди. Росавиация бу ҳаракатларини «дўстона эмас» деб атади.
Аввалроқ Польша россиялик сармоядорлар билан ҳамкорлик қилишдан бош тортгани хабар қилинганди. Шунингдек, Facebook Россия давлат ОАВларига реклама жойлаштиришни тақиқлагани ҳақида хабар берилди.
