Россия Беларуснинг 3,5 миллиард долларлик давлат ташқи қарзини қайта молиялаштиришда ёрдам бериш бўйича таклифларини кўриб чиқишга тайёр. Бу ҳақда Россия молия вазири Антон Силуанов маълум қилди.

Қайд этилишича, декабрь ойида Минск Евроосиё барқарорлаштириш ва тараққиёт жамғармаси (ЕБТЖ) орқали қарзни қайта молиялаштиришни қоплаш учун 3,5 миллиард доллар керак бўлганини маълум қилган. Силуановнинг сўзларига кўра, ЕБТЖда бундай пул йўқ.

«Биз қўшнимизга таъсир қилган чекловлар контекстида Беларуснинг ташқи кредиторлар, биринчи навбатда Россия Федерацияси олдидаги қарз мажбуриятларини қайта молиялаштиришни қўллаб-қувватлаш зарурлигини кўрмоқдамиз», деган россиялик вазир.

Унинг сўзларига кўра, Москва Беларуснинг Россия олдидаги қарз мажбуриятларини қайта молиялаштиришда ёрдам беришни муҳокама қилишга тайёр. Аввало, Россия ва ЕБТЖга қарзни қайтариш кўзда тутилган, бу йилига тахминан 1 миллиард долларни ташкил этади.

«Бу қандай форматда бўлади — Евроосиё жамғармаси орқалими ёки давлатлараро кредитларми, биз қарор қиламиз», — деган Антон Силуанов.

Унинг таъкидлашича, Россия Беларусга ёрдам беришга қатъий қарор қилган.

Таъкидланишича, ноябрь ойи охирида Беларусь Молия вазирлиги 2021 йил бошидан буён Беларуснинг ташқи давлат қарзи 5,8 фоизга (1 миллиард доллар) ошганини маълум қилган. Ички давлат қарзи йил бошидан буён 16,2 фоизга (1,4 миллиард рубль) ошган ва 10,2 миллиард рублни ташкил этган. 2 декабрь куни АҚШ Беларусга қарши, жумладан давлат қарзи бўйича ҳам, санкциялар киритган.

Аввалроқ Лукашенко Украинанинг Беларусь калийли ўғитларидан воз кечганини айтгани хабар қилинганди. Шунингдек, АҚШ Путин атрофидаги элита вакилларига нисбатан санкциялар тайёрлаётгани ҳақида хабар берилди.