Электроника таъминотчилари Россияда бир қатор премиум қулоқчинлар етишмовчилиги юзага келишидан огоҳлантирди. Бу ҳақда «Коммерсанть» хабар берди.

Маълум бўлишича, Sennheiser, Marshall, Sony каби ишлаб чиқарувчилари ўз маҳсулотларини Россияга етказиб беришдан бош тортганлиги сабабли, мамлакат чакана савдо дўконларида бундай ускуналар захираси чорак охиригача тугаши мумкин. Йирик бозорлар вакиллари параллель импорт туфайли уларда етарли миқдорда товар борлигига ишонтиряпти.

Лекин мутахассислар бу схема бўйича импорт қилинадиган маҳсулотлар кўпинча қалбаки бўлиб чиқишидан огоҳлантирган. Таъкидланишича, ҳаридорлар JBL, Sony ва бошқа қулоқчинларни сотиб олишни сўраб мурожаат қилмоқда. Етказиб беришдаги муаммолар туфайли эса жавонлар тезда бўшаб қолаётгани айтилган.

Ҳозирда JBL, Bose, Harman Kardon Россиядаги ваколатхоналарини ёпган. Бошқа сотувчилар бундай баёнот бермаган, лекин товар етказиб беришни тўхтатиб қўйган. Улар орасида Marshall, Sennheiser, Samsung, Sony кабилар бор.

«Коммерсант»нинг қўшимча қилишича, газета журналисти энг йирик чакана сотувчилар сайтларида харидорлар учун мавжуд бўлган премиум қулоқчинларни топа олмаган.

Аввалроқ Россияда янги автомобиллар 40 фоизга қимматлашгани хабар қилинганди. Автомобиль ишлаб чиқарувчилар веб-сайтларидаги очиқ нархлар рўйхатига кўра, автомобиллар 35–45 фоизга қимматлашган.

Олдинроқ Haval каби баъзи импортёрлар ва дистрибюторлар чакана нархларни веб-сайтлардан олиб ташлашни бошлаган. Бу қарор валюта курсининг ўзгарувчанлиги билан боғлиқ, шунинг учун тез-тез нархлар рўйхатини қайта кўриб чиқиш керак бўлади.

Lada автомобиллари март ойидаёқ икки баравар қимматлашганди. «АвтоВАЗ» нархларни 11–47 фоизга оширди. Kia нархи 24–39 фоизга ошган.