Самарқандда 2022 йил учта янги ГЭС қурилади
Янги Ўзбекистон Тараққиёт стратегиясида «яшил» энергетика соҳасини ривожлантириш кўзда тутилган.
Ўзбекистонда 2022 йил гидроэлектр соҳасида 7 та лойиҳа ишга туширилади. Бу ҳақда Энергетика вазирлиги матбуот хизмати хабар берди.
Маълум қилинишича, Янги Ўзбекистоннинг 2022–2026 йилларга мўлжалланган Тараққиёт стратегиясида республикада «яшил» энергетика соҳасини келгусида янада ривожлантиришга алоҳида эътибор берилган. Жумладан, 2022 йилда гидроэнергетика соҳасида умумий қуввати 173 мегаватт бўлган 7 та лойиҳа ишга туширилади.
Хусусан, 2022 йилда Самарқанд вилоятида 3 та янги гидроэлектр станциялар қурилади. Шунингдек, Сурхондарё, Самарқанд ва Тошкент вилоятларидаги мавжуд 4 та гидроэлектр станция модернизация қилинади.
Бунинг натижасида 173 мегаватт янги қувватлар яратилиб, мамлакат гидроэлектр станцияларининг умумий қуввати 2225 мегаваттга етказилади.
Аввалроқ Ўзбекистонда 2026 йилгача 8 та шамол электр станцияси қурилиши хабар қилинганди. Шунингдек, Ўзбекистондаги иккинчи йирик «Пском» ГЭСи қурилаётгани ҳақида хабар берилди.
