Америка Қўшма Штатлари Россиянинг Украинадаги ҳарбий ҳаракатларига қарши чоралар кўрмоқда. Расмий Вашингтон «Сбербанк», «Газпромбанк», «Открытия» Банклари, «Совкомбанк», «Новикомбанк»га қарши санкциялар киритади. Бу ҳақда АҚШ Молия вазирлиги сайтида хабар берилди.

Маълум бўлишича, ушбу хабарлар фонида «Сбербанк» акциялари 40 фоиздан кўпроққа тушиб кетган.

АҚШ Ғазначилигининг тушунтиришича, «Сбербанк» ўз мижозлари учун амалга оширишга уринаётган доллардаги барча тўловлари Америка банкларига кирганида рад этилади.

АҚШ Молия вазирлиги маълумотларига кўра, санкциялар умуман олганда, Россия банк секторининг қарийб 80 фоизини қамраб олади. Шунингдек, барча Америка молия институтларига 30 кун ичида , «Сбербанк»нинг вакиллик ҳисобларини ёпиш буюрилган.

Бундан ташқари, АҚШ «АП Иванов» савдо уйининг собиқ раҳбари Иванов, «Роснефть» раҳбари Сечин ва Федерал хавфсизлик хизмати директори Патрушевнинг ўғилларига нисбатан санкциялар киритаётганини эълон қилган.

Бунга қадар, АҚШ Президенти Жо Байден Путиннинг Украинадаги ҳарбий ҳаракатларига жавобан жиддий чоралар кўришини маълум қилганди.

«Биз киритаётган санкциялар Россиянинг SWIFT банклараро тизимидан узилиши таъсиридан ошиб кетади. Улар илгари киритилган ҳар қандай чекловлардан устун бўлади», — дейди Америка раҳбари.

Унинг сўзларига кўра, чекловлар Банк ВТБ, юқори технологияли импорт ва бизнес учун валюта операцияларига таъсир қилади. Россия доллар, фунт ва йенада бизнес юритишдан чеклаб қўйилади. Шунингдек, АҚШ ва G7 етакчилари Россиядан юқори технологияли маҳсулотлар импортини 50 фоизга чекламоқчи.

Аввалроқ Европа Иттифоқи давлатлари бир овоздан Россияга қарши санкциялар пакетини қабул қилгани хабар қилинганди.