Шавкат Мирзиёев «Янги Ўзбекистон» массивлари лойиҳалари билан танишди
Президент янги мавзеларда кўплаб мактаб, боғча ва тиббиёт муассасалари қуриш бўйича кўрсатмалар берди
Шавкат Мирзиёев Ўзбекистон Президенти лавозимига киришиш маросимида келгусида 1 миллиондан ортиқ аҳоли учун барча қулайлик ва ижтимоий инфратузилмага эга бўлган «Янги Ўзбекистон» массивлари бунёд этилишини айтган. Бу ҳақда Президент матбуот хизмати хабар берди.
Маълум қилинишича, 2021 йилнинг 2 ноябрь куни ўтказилган видеоселектор йиғилишида бу дастурнинг амалий жиҳатлари муҳокама қилинган. Ўтган бир ойда янги массивлар учун шаҳар ёки туман марказига яқин, инфратузилмага эга жойлар танланиб, дастлабки лойиҳалар шакллантирилган. Лойиҳалар 30 ноябрь куни давлат раҳбари ҳузурида тақдимот қилинган.
Режага кўра, 2022 йилда 22 та янги массив барпо этилади. Қурувчи ташкилотларга енгиллик бериш мақсадида фақатгина кўп қаватли уй-жой майдонининг ўзи аукцион орқали сотилади. Туташ майдонлар эса, қурилиш битганидан кейин, уй-жой мулкдорларига умумий фойдаланишга берилади. Тадбиркорлик учун ер участкалари электрон онлайн аукцион орқали ажратилади.
Қайд этилишича, давлат раҳбари янги мавзеларда кўплаб мактаб, боғча ва тиббиёт муассасалари қуриш бўйича кўрсатмалар берган. Кичик саноат зонаси, тадбиркорлик объектлари ташкил этиш орқали камида 50 мингта иш ўрни яратиш мумкинлиги таъкидланган.
Аввалроқ Президент янги уй-жой массивлари нархини 2021 йилги даражада ушлаб қолиш зарурлигини айтгани хабар қилинганди. Шунингдек, Ўзбекистонда кўп квартирали уйлар 1 Гбит/с тезликдаги Интернетга уланиши ҳақида хабар берилди.
