Ахборот технологиялари ва коммуникацияларини ривожлантириш вазири Шерзод Шерматов 18 май куни SAP компанияси вакиллари билан учрашди. Бу ҳақда вазирлик матбуот хизмати хабар берди.

Учрашувда истиқболли йўналишларда, жумладан, таълим ва IT-тадбиркорлик соҳасида қўшма лойиҳаларни амалга оширишда ҳамкорлик олиб бориш масалалари муҳокама қилинган.

АКТ вазирлиги томонидан ўзаро манфаатли ҳамкорликни кенгайтириш мақсадида, компанияга Ўзбекистонда минтақавий офисини очиш бўйича таклифлар берилгани маълум қилинди.

Қайд этилишича, IT Park резиденти бўлган хорижий IT-компанияларга инфратузилма ва солиқ имтиёзлари тақдим этилади. Хорижий IT-мутахассислар ва уларнинг оила аъзолари учун визалар олишнинг соддалаштирилган IT Visa тизими жорий этилди.

Учрашув давомида компания иштирокида кадрлар малакасини ошириш, соҳага инвестицияларни жалб қилиш, янги телекоммуникация технологиялари ва хизматларини жорий этиш масалаларига эътибор қаратилди.

АКТ соҳасида ҳамкорлик қилиш ва келгусида ҳамкорликни йўлга қўйиш бўйича фикрлар алмашилди.

Маълумот ўрнида, SAP ташкилотлар учун дастурий таъминот ишлаб чиқарувчи йирик компания ҳисобланади. Унинг бош ош қароргоҳи Вальдорфда жойлашган.

Аввалроқ Германия дастурий таъминот ишлаб чиқарувчиси SAP ўз веб-сайтида Россия бозорини тарк этишини маълум қилганди.