Сўровнома: 2022 йилда иш билан банд бўлган айрим ўзбекистонликлар IT’да ишлаш учун қайта тайёрланишни режалаштирмоқда
HeadHunter Kommers.uz’га тақдим этган сўровнома натижаларига кўра, Ўзбекистонда 25–35 ёшдаги ёш мутахассислар IT соҳасида бемалол иш бошлаши мумкинлигига ишонади, лекин кўпинча қайта тайёрланишга қарор қилмайди.
Иш билан банд бўлган ўзбекистонликларнинг деярли 26 фоизи ахборот технологиялари соҳасида ишлаш учун қайта тайёрланишни режалаштирмоқда. Бу бўйича ўткаизлган сўровнома натижаларини HeadHunter Kommers.uz’га тақдим этди.
Маълум бўлишича, сўровнома hh.uz сайти фойдаланувчилари ўртасида ўтказилган. Сўровда 652 нафар Ўзбекистон фуқароси иштирок этган. Унга кўра, 25–35 ёшдаги ёш мутахассислар ахборот технологиялари соҳасида бемалол иш бошлаши мумкинлигига ишонади, лекин кўпинча қайта тайёрланишга қарор қилмайди.
Респондентларнинг 10 фоизи аллақачон IT соҳаси бўйича қайта тайёрлаш курсларида қатнашган. Уларнинг 48 фоизга яқин келажакда шундай қилишни режалаштирмоқда. Қолган 42 фоиз иштирокчилар эса бунга шошилмаяпти. Бyнга уларда IT-мутахассиснинг ишини эплолмаслик ёки ўқиш учун жуда кўп вақт талаб этилиши каби хавотирлар сабаблиги айтилган.
Респондентлар IT соҳасига киришни хоҳлашининг асосий сабаблари қуйидагича:
- Юқори иш ҳақи.
- Бу мутахассисларга талаб.
- Мослашувчан жадвал асосида масофадан туриб ишлаш имконияти.
- Халқаро компанияларга ишга жойлашиш имконияти.
- Саёҳат қилиш имконияти.
Аввалроқ Ўзбекистонда IT соҳаси бўйича иш таклифлари сўнгги 4 йилда қанчага кўпайгани бўйича маълумот берилганди. Қайд этилишича, сўнгги тўрт йилда «Ахборот технологиялари, интернет, телеком» йўналиши бўйича бўш иш ўринлари сони 6 баробардан зиёдга кўпайган. 2022 йилнинг биринчи ярмида ўзбекистонлик иш берувчилар 4,5 мингга яқин бўш иш ўринлари бўйича эълон жойлаштирган.