
TAG Heuer «ақлли» соатнинг янги авлодини намойиш этди (фото)
Янги соат 2022 йил март ойида сотувга чиқарилади.

Швейцариянинг TAG Heuer соат бренди Connected Caliber E4 моделли «ақлли» соатининг янги авлодини тақдим этди. Бу ҳақда «Коммерсантъ» хабар берди.
Истеъмолчилар турли материаллардан тайёрланган диаметри 42 ва 45 миллиметр бўлган корпусларда соатларни олиш имкониятига эга бўлади. Янги дизайн силлиқ чизиқлари билан бошқалардан ажралган, тугмалар янада кичрайган.

Экран ёқут кристалли билан ҳимояланган. Qualcomm’дан Snapdragon 4100 Plus процессори, Bluetooth 5.0’ни қўллаб-қувватлаш ва кун давомида қайта зарядланмасдан ишлашни таъминлайдиган кенгайтирилган батарея қўшилган. Соат янги магнит док-станция билан қувватланади.

Connected Caliber E4 соати Wear OS тизимида ишлайди ва фойдаланувчи соғлиғини кузатишнинг турли функцияларини, шунингдек, бир нечта машқ опцияларини қўллаб-қувватлайди. Янги TAG Heuer соати 2022 йил март ойида сотувга чиқарилади: диаметри 42 миллиметр бўлган соатнинг нархи 1,8 минг доллардан, 45 миллиметрли модель эса камида 2 минг доллар туради.
Аввалроқ Reebok ўзининг биринчи «ақлли» соатини ишлаб чиқаргани хабар қилинганди. Шунингдек, Google «ақлли» соатлар ишлаб чиқаришни бошлаши ҳақида хабар берилди.




