Tesla бошқарув кенгаши аъзоси, Илон Маскнинг укаси Кимбал Маск компания 1,5 миллиард долларлик криптовалюта сотиб олишини эълон қилганида биткоин қазиб олишнинг атроф-муҳитга таъсиридан бехабар бўлганини айтди. Бу ҳақда TechCrunch хабар берди.

«Биткоинга сармоя киритганимизда биз жуда жоҳил эдик. Биз бунинг атроф-муҳитга таъсири ҳақида ҳеч қандай тасаввурга эга эмас эдик, том маънода ҳеч нарса билмасдик, бизга бу яхши қиймат захираси ва активларни диверсификация қилиш усулидек туюлди. Атроф-муҳит билан нима қилаётганимиз ҳақида миллионта хабар олишимизга кўп вақт керак бўлмади», — деган Кимбал Маск.

Кимбал Маск 2004 йилдан бери Tesla директорлар кенгашида ишлайди. Унинг қўшимча қилишича, блокчейн технологиялари янада экологик тоза инфратузилмага ўтиши мумкин бўлади.

Кенжа Маскнинг Big Green хайрия ташкилоти кўпроқ энергия талаб қиладиган блокчейнда ишлайдиган DAO бошқарув тузилмасига ўтган. Кимбал Маск Tesla криптовалюталардан фойдаланишдан воз кечмасдан, уларнинг атроф-муҳитга таъсирини камайтириш йўлини топиш керак, деб ҳисоблайди.

«Криптовалюта кўп даражаларда яхши ғоя ва биз унинг истиқболли келажаги борлигига ишонамиз, лекин у катта экологик харажатлар эвазига келмайди. Tesla биткоин сотмайди ва биз майнинг янада барқарор энергияга ўтиши билан ундан транзакциялар учун фойдаланиш ниятидамиз», — деб ёзган Илон Маск 2021 йилнинг май ойида.

Маълумот ўрнида, Tesla 2021 йил февраль ойида 1,5 миллиард долларлик биткоин сотиб олганди ва вақтинча мижозларга у билан автомобиль сотиб олишга рухсат берган. АҚШ Қимматли қоғозлар ва биржа бўйича комиссиясига (SEC) берилган ҳужжатларда компания биткоинни «каттароқ мослашувчанлик ҳамда нақд пул даромадларини янада диверсификация қилиш ва ошириш» учун сотиб олгани айтилган.

Аввалроқ Илон Маск SEC’ни ўзи ҳақидаги тергов маълумотларини сиздиришда айблагани хабар қилинганди. Шунингдек, Маскнинг компанияси ҳайвонларга шафқатсиз муносабатда бўлгани ҳақидаги айбловларни рад этгани ҳақида хабар берилди.