АҚШнинг электромобиль ишлаб чиқарувчи Tesla компанияси хавфсизлик нуқтаи назаридан Хитой бозоридан 26 мингдан ортиқ автомобилни қайтариб олишга қарор қилди. Бу ҳақда «Синьхуа» агентлиги 18 февраль куни Хитой расмийларига таяниб хабар берди.

Қайд этилишича, Tesla компаниясининг Шанхай филиали ташаббуси билан «чақириб олиш» қарори 2020 йил 28 декабрдан 2022 йил 15 январгача Хитойда ишлаб чиқарилган 12 минг дона Tesla Model 3 электромобили ва 14 минг та Model Y электромобилига тегишли.

Tesla’нинг аниқлик киритишича, ушбу электромобилларда иссиқлик насосида нуқсон бор, бу эса автомобилни ишлатиш вақтида потенциал хавфли вазиятни юзага келтириши мумкин. Компания носоз автомобиллардаги нуқсонларни бепул тузатишга ваъда берган.

Қайд этиш керакки, Tesla биринчи марта электромобилларини қайтариб олаётгани йўқ. Бунга қадар компания машиналар жуда паст овоз чиқараётгани, хавфсизлик камарининг сигналидаги муаммо,  автопилот дастуридаги нуқсон ва бошқа сабаблар туфайли миллиондан ортиқ машиналарини «чақириб олган».