Tesla яна ярим миллиондан ортиқ электромобилни «чақириб олади»
Компания машиналар жуда паст овоз чиқараётгани сабабли уларни заводга қайтаришга қарор қилди.
Tesla компанияси яна 579 мингта электромобилни чақириб олади. Бу ҳақда Reuters хабар берди.
Маълум қилинишича, Tesla бир ой ичида учинчи марта электромобилларни чақириб олади. Бу сафар 579 мингта машина заводга қайтарилади.
Февраль ойи бошида Tesla автопилотдаги муаммолар туфайли 54 мингта электромобилни ва хавфсизлик камаридаги муаммолар туфайли 817 мингта электромобилни чақириб олган эди. Шу тариқа, биргина 2022 йилнинг февраль ойида Тесла 1,45 миллион электромобилини қайтариб олади.
Қайд этилишича, компания 2020–2022 йилларда ишлаб чиқарилган S, X, Y моделларидаги ва 2017–2022 йилларда ишлаб чиқарилган Model 3 электромобилларини қайтариб олмоқда.
Муаммо шундаки, машиналар ҳаракатланаётганда жуда паст овоз чиқаради. Электрокарлар ҳаракатланаётганда деярли шовқин чиқармаслиги сабабли уларга ҳаракатланаётган автомобилнинг овозини тақлид қилувчи махсус тизим ўрнатилган. Бу пиёдалар уларни пайқаши учун мўлжалланган.
Маълум бўлишича, карнайларнинг ишлаши хавфсизлик талабларига жавоб бермайди. Муаммони дастурий таъминотни янгилаш орқали ҳал қилиш режалаштирилган.
Аввалроқ, 1 февраль куни Tesla автопилотидаги муаммо туфайли АҚШда 53 мингдан ортиқ автомобилларини чақириб олиши хабар қилинганди. Шунингдек, 3 февраль куни компания 817 мингдан ортиқ электромобилни хавфсизлик камарининг сигналидаги муаммо туфайли чақириб олиши ҳақида хабар берилди.
