Тошкент ялпи ҳудудий маҳсулоти 14,1 фоизга ўсди
Кўрсаткич 2021 йилнинг январь-октябрь ойларида 87,8 трлн сўмга етган
Тошкент шаҳри ялпи маҳсулотида ўсиш 14,1 фоизни ташкил этди. Бу ҳақда шаҳар ҳокимлиги матбуот хизмати хабар берди.
Иқтисодий ривожланиш ва камбағалликни қисқартириш вазирлигининг маълумотларига кўра, 2021 йилнинг январь-октябрь ойларида пойтахтнинг ялпи ҳудудий маҳсулоти 87,8 триллион сўмни, яъни 2020 йилнинг мувофиқ даврига нисбатан 114,1 фоизни ташкил қилган.
Таъкидланишича, Тошкентнинг Ўзбекистон ялпи маҳсулотидаги улуши ҳудудлар миқиёсида энг катта бўлиб, 16,9 фоиздан иборат.
Шунингдек, республика бўйлаб ялпи ҳудудий маҳсулотнинг ўсиш кўрсаткичлари — 519,8 триллион сўм, яъни 2020 йилнинг мувофиқ даврига нисбатан 106,9 фоизни ташкил қилган.
Аввалроқ Ўзбекистон ЯИМига энг кўп ва энг кам ҳисса қўшаётган ҳудудлар рейтинги эълон қилинганди. Шунингдек, Тошкентда МДҲ давлатларининг II Халқаро банк-молия форуми бўлиб ўтиши ҳақида хабар берилди.
