Тошкентда 10 ноябрдан 12 ноябрга қадар Жаҳон савдо ташкилотига аъзо бўлиш бўйича тренинг ва семинар ўтказилди. Бу ҳақда Инвестициялар ва ташқи саво вазирлиги матбуот хизмати хабар берди.

Маълум қилинишича, пойтахтда «Жаҳон савдо ташкилотига аъзо бўлиш доирасида тўлов баланси ва савдо сиёсати» мавзусида тренинглар ҳамда хусусий сектор вакиллари учун «Жаҳон савдо ташкилотига аъзо бўлиш, хизматлар савдоси ва ички қўллаб-қувватлаш бўйича ЖСТ қоидалари» мавзусида семинар ўтказилган.

Тадбирлар Европа Иттифоқи томонидан молиялаштириладиган «Ўзбекистоннинг ЖСТга аъзо бўлиш жараёнига кўмаклашиш» дастури доирасида ташкил этилган. Уларда инвестициялар ва ташқи савдо вазирининг ўринбосари Бадриддин Обидов раҳбарлигидаги Ўзбекистоннинг ЖСТга аъзо бўлиши бўйича музокаралар гуруҳи вакиллари, UNCTAD/WTO Халқаро савдо маркази экспертлари, вазирликлар, тармоқ бирлашмалари, ишбилармонлар ассоциациялари ҳамда хусусий сектор вакиллари иштирок этган.

Тадбирлар давомида хорижий экспертларнинг тақдимотлари бўлиб ўтган. Уларда Ўзбекистоннинг ЖСТга аъзо бўлишининг афзалликлари ва муаммолари, ушбу жараёнда хусусий секторнинг роли, «Ўзбекистоннинг ЖСТга аъзо бўлиш жараёнига кўмаклашиш» дастури доирасида ўзбек бизнеси вакилларига техник кўмак кўрсатиш йўналишлари очиб берилган.

Шунингдек, иштирокчилар ЖСТ доирасида хизматлар савдосини тартибга солувчи битимлар, хизматлар савдоси бўйича музокаралар хусусиятлари ҳамда музокаралар жараёнида хусусий сектор ва ҳукумат ўртасидаги ўзаро муносабатларнинг долзарб жиҳатлари билан танишган.

Аниқ ҳолатлар мисолида маҳаллий ишлаб чиқарувчиларни қўллаб-қувватлаш чоралари ҳамда уларни хорижий етказиб берувчиларнинг инсофсиз рақобатидан ҳимоя қилиш механизмлари, шунингдек, Ўзбекистоннинг ташкилотга аъзо бўлишининг хизмат кўрсатиш соҳасига таъсири муҳокама қилинган.

Аввалроқ Туркия шаҳарларида Made in Uzbekistan кўргазмаси ўтказилиши ҳақида хабар берилганди.