Hyatt Regency Tashkent меҳмонхонасидаги давлат улушини сотиш жараёни бошланди. Бу ҳақда Давлат активларини бошқариш агентлиги матбуот хизмати хабар берди.

Маълум қилинишича, тегишли хусусийлаштириш дастурларига мувофиқ Hyatt Regency Tashkent меҳмонхонасини хусусийлаштириш жараёнлари бошланган. Савдолар «Пойтахт қурилиш ва хизмат» корхонасининг (меҳмонхонанинг баланс сақловчиси) ташкилий-ҳуқуқий шаклини хўжалик жамиятига ўзгартирилган ҳолда, ундаги 100 фоиз давлат улушини сотувга чиқариш орқали амалга оширилади.

Ушбу савдо жараёнига KPMG Valuation and Consulting компанияси (KPMG), активни хусусийлаштириш бўйича энг яхши таклифларни танлаш асосида, эксклюзив молиявий маслаҳатчи сифатида жалб этилган.

Меҳмонхонани улуш (бизнес) сифатида баҳолаш ишларига «Катта тўртлик»ка (Big 4) кирувчи халқаро компаниялардан бири жалб қилиниб, уларнинг баҳолаш ҳисоботлари асосидаги активнинг тавсиявий баҳолаш қиймати савдо жараёнларида мўлжал сифатида ҳисобга олинади.

Савдо жараёни рақобатбардошлик тамойилларига асосланган ҳолда барча манфаатдор томонлар учун очиқ аризалар бериш йўли билан ташкил этилади. Меҳмонхонани сотиш жараёнида иштирок этишни истаганлардан ўз қизиқишларини билдириши сўралади.

Аввалроқ Ўзбекистондаги банклардан бирининг 100 фоиз улуши Россия банкига сотилгани хабар қилинганди. Шунингдек, Британия компанияси Asia Alliance Bank’нинг 77,2 фоиз улушига эга бўлгани ҳақида хабар берилди.