Туркияда инфляция 1998 йилдан бери илк марта рекорд даражада тезлашди
Туркия Президенти Ражаб Тоййиб Эрдўғон жамоатчиликни сабрли бўлишга чақирди.
Июнь ойида Туркияда истеъмол нархлари йиллик кўрсаткичда 78,6 фоизга ўсди. Бу ҳақда мамлакат статистика идораси (Туркстат) маълумот берди.
Bloomerg’нинг таъкидлашича, Туркияда йиллик инфляция кетма-кет 13 ой давомида тезлашмоқда. Энг катта ўсишни энергия (+151,3 фоиз), транспорт хизматлари (+123,4 фоиз), озиқ-овқат ва алкоголсиз ичимликлар 93,93 фоиз, уй-рўзғор буюмлари 81,14 фоизга қимматлашгани кўрсатди.
Таҳлилчилар учинчи чоракда юқори энергия нархларининг давом этиши, лиранинг заифлашиши ва Туркия Марказий банкининг нархлар ўсишини тўхтатиш учун ставкаларни оширишни истамаслиги фонида инфляция янада ошишини кутишмоқда.
Қайд этилишича, Туркия Марказий банки ўта юмшоқ пул-кредит сиёсатини олиб боришга қарор қилган ва бир йилдан ортиқ вақт давомида ставкани оширмаган, бошқа мамлакатларда эса регуляторлар инфляцияга қарши кураш доирасида ўз ёндашувларини кучайтирган.
Инфляция ҳисоботи эълон қилингандан сўнг лира 0,4 фоизга пасайиб, 1 доллар учун 16,8163 лирани ташкил қилди.
Чоралар
Туркия ҳукумати 1 июль куни энг кам иш ҳақи вақтинчалик деярли 30 фоизга оширилганини эълон қилди. Мамлакат январь ойида энг кам иш ҳақини рекорд даражада 50,5 фоизга оширганди.
Туркия расмийларига кўра, мамлакатдаги барча ишчиларнинг 40 фоиздан ортиғи энг кам маош олади.
Аввалги раис даврида Туркия Марказий банки энг кам иш ҳақининг ошиши туфайли инфляцияга «ижобий зарба» бўлишидан огоҳлантирган эди.
Регуляторнинг 2021 йилги маълумотларига кўра, энг кам иш ҳақининг ҳар 10 фоизга ошиши нархларнинг 1 фоизга кўтарилишига олиб келади.
Туркия Президенти Ражаб Тоййиб Эрдўғон жамоатчиликни сабрли бўлишга чақирди ва инфляция 2023 йилнинг февралидан мартигача «оқилона» даражага тушишини айтди.