Урганч аэропорти вақтинча ёпилди. Истанбулдан учган самолёт Тошкентга фавқулодда қўнди
Авиакомпания йўловчиларни меҳмонхонага жойлаштиришга қарор қилди.
Об-ҳаво шароити, аниқроғи қор ёғишининг кучайгани сабабли Урганч халқаро аэропорти 19 январь куни эрталаб соат 5:00 гача ёпилди. Бу ҳақда Uzbekistan Airports матбуот хизмати хабар берди.
Қайд этилишича, 18 январь куни ноқулай об-ҳаво шароити (қор ёғиши) туфайли Uzbekistan Airways авиакомпаниясининг Истанбул-Урганч йўналиши бўйича HY-280 рейси бўйича самолёти Тошкентдаги муқобил аэродромга фавқулодда қўнган.
«Самолёт бортида 98 нафар йўловчи билан соат 19:29 да пойтахт аэропортига қўнди. Авиакомпания барча йўловчиларни 19 январь эрталабгача меҳмонхонага жойлаштиришга қарор қилди. Дастлабки маълумотларга кўра, самолёт HY-051 рейси билан соат 07:15 да Тошкентдан Урганчга учади», дейилади хабарда.
Маълум қилинишича, Урганч аэропорти ҳозирда ёпиқ. Қор ёғиши кўпайганлиги сабабли учиш-қўниш йўлагининг ишқаланиш коэффиценти 0,3 фоизни ташкил этмоқда, бу эса самолётларнинг учиши ва қўнишига имкон бермайди.
Об-ҳаво маълумотларига кўра, тун бўйи қор ёғади. Шу муносабат билан яна иккита рейс кечиктирилиши кутилмоқда. Қозон-Урганч йўналиши бўйича «Урал ҳаво йўллари» авиакомпаниясининг самолёти белгиланган аэропортга соат 21:45 да қўниши керак эди, бироқ мезбон томоннинг об-ҳаво шароити туфайли ҳалигача Қозондан учиб кетмади.
Red Wings авиакомпаниясининг Москва-Урганч рейси билан ҳам вазият худди шундай. Дастлабки маълумотларга кўра, ҳар иккала рейс ҳам 19 январь эрталабгача қолдирилади.
Аввалроқ Uzbekistan Airways Ўзбекистондан БААга киришда янги қоидалар ўрнатилганини маълум қилганди.