UzAuto Motors 28 декабрда Озарбайжоннинг Ҳожиқобул шаҳрида Damas, Labo, Lacetti, Tracker ва Malibu автомобилларини йиғишни йўлга қўйди. Бу ҳақда компания матбуот хизмати хабар берди.

Маълум қилинишича, ишлаб чиқариш Azermash CP заводининг ишлаб чиқарув қувватларида йўлга қўйилган бўлиб, бу ерда 2021 йилнинг сентябрь ойидан буён Chevrolet Nexia ва Cobalt автомобиллари ишлаб чиқарилмоқда. Барча маҳсулотлар General Motors (АҚШ) томонидан ўрнатилган жаҳон стандартларига мувофиқ ишлаб чиқарилади.

«Ушбу йўналишда кейинги қадам Озарбайжондаги Chevrolet автомобиллари портфолиосини янги перспектив автомобиль моделлари билан тўлдириш шунингдек, келгуси йилларда ишлаб чиқаришни босқичма-босқич ошириш: 2022 йил охирига келиб, йилига камида 5000 та автомобиль ишлаб чиқариш қувватига эришиш режалаштирилган», дейилади хабарда.

Маълумот ўрнида, Боку шаҳри яқинида жойлашган Ҳожиқобул саноат квартали таркибига кирувчи Azermash CP — AVTOSANOAT INVEST (Ўзбекистон) ва STA INSAAT (Озарбайжон) корхоналари томонидан ташкил этилган қўшма компания ҳисобланади.

Лойиҳа томонлар ўртасида 2021 йил 21 июлда имзоланган келишув туфайли амалга оширилган. Қардош давлатлар ўртасидаги муносабатларнинг янги босқичи 2019 йил октябрь ойида, Ўзбекистон Президенти Шавкат Мирзиёевнинг Бокудаги расмий ташрифи вақтида Туркий кенгашнинг саммити доирасида эълон қилинган.

Аввалроқ UzAuto Motors’нинг носозликни текшириш учун 3 турдаги автомобилларни «чақириб олиши» хабар қилинганди.