Uzbekistan Airways Германияга бораётган йўловчиларни огоҳлантирди
Янги қоидаларни бузганлар 25 минг еврогача жаримага тортилиши мумкин.
Uzbekistan Airways Германияга бораётган йўловчиларни огоҳлантирди. Бу ҳақда авиакомпания матбуот хизмати хабар берди.
Маълум қилинишича, «омикрон» штаммининг пайдо бўлиши муносабати билан Германия ҳукумати амалдаги қоидаларга янгиларини киритган.
Қайд этилишича, Германияга келаётган 6 ва ёши ундан катта йўловчилар парвозга чиқишдан олдин Covid-19 тестининг салбий натижасини, касалликдан тузалганини тасдиқловчи ҳужжат ёки Johnson&Johnson, Moderna, AstraZeneca, Pfizer вакциналари билан эмланганлик сертификатини тақдим этиши керак.
Шунингдек, антиген тести Германияга киришдан 48 соатдан кўп бўлмаган вақтда, ПЗР-тестлари эса парвоздан 48 соат олдин ўтказилган бўлиши керак. Германия Ўзбекистонни «бошқа ҳудудлар» рўйхатига киритгани сабабли www.einreiseanmeldung.de сайтида рақамли шаклни тўлдириш ва карантинда бўлиш талаб этилмайди.
Таъкидланишича, қоидаларни бузганлик учун 25 минг еврогача жарима солиниши мумкин.
Аввалроқ Uzbekistan Airways Буюк Британияга бормоқчи бўлган йўловчиларга мурожаат қилганди. Шунингдек, Uzbekistan Airways талабалар учун чегирмаларни узайтиргани ҳақида хабар берилди.