Uzbekistan Airways Киевга парвозларни бекор қилди
Авиакомпания ҳар қандай ўзгаришлар ҳақида қўшимча равишда хабардор қилади.
Uzbekistan Airways АЖ Киевга парвозлар бекор қилинганини маълум қилди. Бу ҳақда компания матбуот хизмати хабар берди.
Қайд этилишича, Украина ҳаво ҳудуди йўловчи ҳаво кемалари қатновлари учун ёпилиши муносабати билан HY-3731/3732 Тошкент–Киев–Тошкент мунтазам қатновлари 2022 йилнинг 27 февраль ва 2 март кунлари режалаштирилган парвозлари бекор қилинади.
Бекор бўлган парвозлар йўловчилари авиачипталарининг тўлиқ қийматини чипта сотиб олинган жойда қайтариб олишлари ёки парвозлар қайта тикланганидан кейин бошқа санага бепул қайта бронлаш ҳуқуқига эгадир.
«Uzbekistan Airways АЖ йўловчиларни жадвалдаги ҳар қандай ўзгаришлар ҳақида қўшимча равишда хабардор қилади», дейилади хабарда.
Аввалроқ Россияга учган самолёт Наманган аэропортига мажбурий қайтаётгани, бироқ Урганчга фавқулодда қўнгани хабар қилинганди. Шунингдек бутун Украина ва Россия жанубида фуқаролик самолётларининг парвозлари тўхтатилгани ҳақида хабар берилганди.
