Uzbekistan Airways 2022 йил 6 январга мўлжалланган Қозоғистоннинг Оқтўбе ва Олмаота шаҳарларига парвозлар бекор қилинганини маълум қилди. Бу ҳақда компания матбуот хизмати хабар берди.

Қайд этилишича, 2022 йил 6 январга мўлжалланган HY9729/9730 Нукус–Оқтўбе–Нукус ва HY763/764 Тошкент–Олмаота–Тошкент йўналишлари бўйича авиақатновлар етиб борадиган аеропортларнинг техник сабабларига кўра бекор қилинган.

Хабарга кўра, ушбу йўналиш бўйича парвозларни амалга ошириш кунлари ҳақидаги маълумот қўшимча эълон қилинади.

Шунингдек, йўловчилар 6 январь куни Олмаота ва Оқтўбега бекор бўлган парвозлар авиачипталарининг тўлиқ қийматини чипта сотиб олинган жойда қайтариб олишлари ёки бошқа санага бепул қайта бронлаш ҳуқуқига эгадир.

Аввалроқ Uzbekistan Airways Қозоғистоннинг намойишлар авж олган Оқтов шаҳрига 5 январь кунги авиақатновларни бекор қилгани ҳақида хабар берилганди.