UZCARD контактсиз тўлов амалга оширадиган янги картани намойиш этди
Картани чиқариш ва фаоллаштирилгунга қадар шахсийлаштириш жараёни тахминан 5 дақиқа давом этади.
UZCARD NFC технологиясидан фойдаланган ҳолда контактсиз тўловни амалга оширадиган картани намойиш этди. Бу ҳақда компания матбуот хизмати хабар берди.
Маълум қилинишича, 30 март куни Тошкент шаҳридаги UZCARD компаниясининг бош офисида «Сизнинг тезкор UZCARD картангиз» мавзусида аҳолини янги хизмат билан таништиришга бағишланган катта матбуот анжумани бўлиб ўтди.
Компания NFC технологиясидан фойдаланган ҳолда контактсиз тўловни амалга оширадиган карта билан ўртоқлашди. Тадбир давомида UZCARD вакиллари иштирокчи банк филиалларида карталарни тезкор чиқаришни ташкил этиш имконини берувчи пластик карталарни тақсимланган эмиссияси хизмати ҳақида сўзлаб берди.
Таъкидланишича, мижоз банкга мурожаат қилган пайтдан бошлаб, карта чиқарилиб ва фаоллаштирилгунга қадар шахсийлаштириш жараёни тахминан 5 дақиқа давом этади. Яъни, картани чиқариш ва олиш учун банкка икки марта келиш шарт эмас, мижоз мурожаат қилинган куни дарҳол UZCARD картасини олиб, молиявий операцияларни амалга оширишни бошлаши мумкин.
Қайд этилишича, компания янги турдаги маҳаллий UZCARD, UZCARD-Unionpay, UZCARD-Mastercard ва UZCARD-«Мир» каби турли хил карта маҳсулотларини тақдим этиш, шунингдек, контактсиз тўловларни қабул қилиш ва NFC технологияси билан карталардан бошқа операцияларни амалга ошириш учун терминал инфратузилмасини ривожлантирмоқда. Ушбу карталар ёрдамида жамоат транспортида йўл ҳақини тўлаш мумкин.
Аввалроқ UZCARD Sber500 билан Ўзбекистон венчур капитал бозорини ривожлантириши хабар қилинганди. Шунингдек, UZCARD ва Humo карталари терминаллари бирлаштирилиши ҳақида хабар берилди.