Режиссёр Питер Жексон видеоўйинлар ишлаб чиқарувчи Unity Software компанияси билан тузилган шартнома сабабли миллиардерга айланди. Бу ҳақда Forbes хабар берди.

Ҳафта бошида, 9 ноябрь куни Unity Software компанияси Жексон шериклари билан асос солган Янги Зеландия махсус эффектлар студияси Weta Digital активларининг бир қисмини сотиб олди. Битим қиймати 1,6 миллиард долларни ташкил этди.

Forbes’нинг консерватив ҳисоб-китобларига кўра, келишув Жексонни расман миллиардерга айлантиради. Нашрнинг Янги Зеландия реестри маълумотларига таяниб ёзишича, Жексон ва унинг севгилиси Фрэн Уолш Weta Digital’нинг 60 фоиз акцияларига эгалик қилади.

Битим шартларига кўра, Unity Software Weta Digital акциядорларига 1 миллиард доллар нақд пул, қолганини эса ўз улушларида тўлайди. Келишув натижасида Жексон тахминан 600 миллион доллар нақд пул ва 375 миллион доллар Unity Software акцияларига эга бўлади.

Маълумотларга кўра, «Узуклар ҳукмдори» трилогиясининг ҳар бир фильми учун Жексон олдиндан 10 миллион долларга эга бўлган. Бутун дунё бўйлаб трилогиянинг умумий касса даромади деярли 3 миллиард долларни ташкил этган.

Аввалроқ режиссёр Стивен Спилберг 86 метрли супер яхтасини сотиб юборганди.