Япония Украина инқирози туфайли Европага газ етказиб беришга тайёрлигини билдирди. Бу ҳақда япон ОАВлари Kyodo ва NHK ҳукумат манбаларига таяниб хабар берди.

Қайд этилишича, Украинадаги вазият кескинлашиб, Россия ва Ғарб ўртасида можарога олиб келиши мумкин бўлган тақдирда Япония ўз захираларининг бир қисмини Европага етказиб беришга тайёр. Япониядан буни АҚШ илтимос қилган.

Маълумотларга кўра, Япониядан қишки даврда Европага энергия ёрдами кўрсатишни АҚШ сўраган. Бу талаб Европа газ импортининг 40 фоизи Россия ҳиссасига тўғри келиши билан ҳам боғлиқдир. Бироқ, биринчи навбатда, Япония ички эҳтиёжлар учун етарли миқдорда таъминотни таъминлаши керак. Япония ҳукумати ҳамкорлик сўрови билан япон компанияларига мурожаат қилиши мумкин.

«Халқаро энергетика агентлиги таъкидлаганидек, Россия давлат компаниялари айни пайтда табиий газ етказиб беришни тўхтатиб қўймоқда, бу эса европаликлар дуч келаётган рекорд даражадаги юқори нархларни келтириб чиқармоқда», — деган 7 февраль куни АҚШ Давлат котиби Энтони Блинкен.

Россиянинг Европа Иттифоқидаги доимий вакили Владимир Чижов сўзларига кўра, «Газпром» Европа Иттифоқига газ экспортини кўпайтиришга мажбур эмас, у аллақачон қўшимча ҳажмларни етказиб бермоқда.

АҚШ ва ЕИ Европага газ етказиб бериш бўйича Осиё давлатлари билан музокараларни бошлаган. АҚШ ва унинг Европадаги иттифоқчилари, агар Россия иштирокида Украина бўйича можаро бошланса, Осиёнинг бир неча йирик табиий газ импорт қилувчи компанияларидан уни Европага жўнатишни сўраган.

Бундан ташқари, Оқ уй бошқа газ ишлаб чиқарувчилар, жумладан, Қатар, Нигерия, Миср ва Ливия билан фавқулодда газ ишлаб чиқаришни кўпайтириш бўйича музокаралар олиб бормоқда. Россия эса Украина билан можарони кучайтириш режаларини бир неча бор рад этган.

Аввалроқ Европадаги газ омборлари 85 фоизга бўшагани хабар қилинганди. Шунингдек, Европа Иттифоқи Озарбайжон билан газ етказиб беришни муҳокама қилиши ҳақида хабар берилди.