Хитой истеъмолчиларни KFC рекламасини бойкот қилишга чақирди
KFC ташкиллаштирган акцияда иштирокчи 106 та порция таом сотиб олган.
Хитой истеъмолчиларни KFC ва ўйинчоқлар ишлаб чиқарувчи Pop Mart реклама акциясини бойкот қилишга чақирди. Бу ҳақда Bloomberg хабар берди.
Хитой ҳукумати фикрича, KFC озиқ-овқат исрофгарчилигини рағбатлантирган. Компания акцияси Хитойда KFC’нинг 35 йиллиги муносабати билан ташкиллаштирилган.
Қайд этилишича, акция иштирокчиларидан бири KFC’дан 106 та порция таом сотиб олиб, Pop Mart ўйинчоқларининг бутун коллекциясини йиғиш учун 1,65 минг доллар сарфлаган. Баъзи меҳмонлар KFC’да сотиб олган таомларини ейиш ёки шунчаки ташлаб юбориш учун бошқаларга пул тўлаган.
«Озиқ-овқат сотувчиси бўла туриб KFC кераксиз егуликни исрофгарчилик билан сотиб олишга чақирди ва буни рағбатлантирди. Бу ахлоқ ва меъёрларга, шунингдек, қонун ҳужжатларига зиддир», деган ҳукумат назоратидаги Хитой истеъмолчилар уюшмаси.
KFC оператори бўлган Yum China Holdings’нинг вакиллари ва Pop Mart Bloomberg’нинг изоҳ сўровларига дарҳол жавоб бермаган. Шу билан бирга, Ҳонконг фонд биржасида компаниялар акциялари қаттиқ зарба олмаган — Yum 0,9 фоизга ва Pop Mart 7,2 фоизга ошган.
Хабарга кўра, Хитой ҳукумати ва давлат матбуоти тез-тез хорижий брендларни танқид қилади, савдога путур етказади ва раҳбарларни кечирим сўрашга мажбур қилади. Canada Goose, Mercedes-Benz, Walmart ва Intel 2021 йил охирида Хитойни тарк этган.
Шунингдек, 2020 йилда Си Цзиньпин ҳукуматининг озиқ-овқат исрофига қарши кутилмаган кампанияни бошлаб юбориши билан Хитойнинг 1,4 миллиард фуқарони боқа олмаётгани ҳақидаги миш-мишлар тарқалганди. Кейинроқ расмийлар мамлакатда етарлича озиқ-овқат захираси борлигини айтган.
Аввалроқ Хитой БМТга Илон Маскнинг лойиҳаси устидан шикоят қилгани ҳақида хабар берилганди. Шунингдек, Хитой ҳукумати Alibaba’ни монополияга қарши қонунни бузгани учун жаримага тортгани хабар қилинди.