Ўзбекистон ва АҚШ бизнес жараёнларини аутсорсинг қилиш бўйича корпорация ташкил этади
Бўлажак корпорация 3 йил ичида 1100 та иш ўрни яратилиши ҳамда АҚШ ва Ўзбекистонда юридик шахс тадбиркорлик субъектлари очилишини назарда тутади.
Ўзбекистон ва АҚШ ўртасида бизнес жараёнларини аутсорсинг қилиш бўйича корпорация ташкил этилади. Бу ҳақда Калифорния штати Ирвин шаҳрида ўтказилган Uzbekistan-USA: Logistics Technology & BPO Shared Opportunities номли тадбирда маълум қилинди.
Nадбир доирасида Ўзбекистон Ахборот технологиялари ва коммуникацияларини ривожлантириш вазирлиги ва Access Capital Management Corp ўртасида IT ва BPO соҳасида ўзаро ҳамкорлик тўғрисида шартнома имзоланиши ва қўшма корпорация ташкил этилишига бағишланган маросим бўлиб ўтди.
Маълум қилинишича, бўлажак корпорация 3 йил ичида 1100 та иш ўрни яратилиши ҳамда АҚШ ва Ўзбекистонда юридик шахс тадбиркорлик субъектлари очилишини назарда тутади.
Янги корпорация миқёсида суғурта, факторинг, QA (сифат назорати) ва мультимедия каби йўналишлар бўйича бизнес-жараёнларни аутсорсинг фаолиятини кенгайтириш бўйича келишувларга эришилганлиги қайд этилди.
Шунингдек, тадбирнинг расмий қисмидан сўнг Америка компаниялари иштирокида B2B форматидаги учрашувлар ўтказилган. Унда IT Park резиденти мақомини олиш тартиби ва резидентларга тақдим этиладиган имтиёзлар муҳокама қилинган.
Маълумот учун, Business Process Outsoursing (бизнес жараёнлари аутсорсинги) аутсорсинг турларидан бири бўлиб, бунда ташкилот асосий бўлмаган бизнес жараёнларини бошқа компания зиммасига юклайди.