Россия Президенти Владимир Путин «дўстона бўлмаган» давлатларга табиий газ рублда сотилишини эълон қилганидан кейин Европада газ нархи 20 фоизга ошди. Бу ҳақда Forbes хабар бермоқда.

Энг юқори чўққидаги газ нархи 1 мегаватт/соат учун 118,75 еврогача кўтарилди — бу биржанинг 22 мартдаги ёпилиш даражасидан қарийб 20 фоизга кўпдир. Тошкент вақти билан соат 18:40 ҳолатига кўра, Голландиядаги TTF ҳабида газ етказиб бериш бўйича шартномалар 1 мегаватт/соат учун 116,4 еврога баҳоланмоқда, бу 23 мартдаги савдолар ёпилишидан 17,9 фоизга кўпдир.

Путиннинг нутқи олдидан газ фючерслари кун давомида савдо бошланишидаги нархга нисбатан тахминан 11,5 еврога қимматлашган. Бироқ, Россия Президентининг баёнотидан сўнг, нархлар тахминан 10 дақиқада дарҳол 10 еврога кўтарилди — 1 мегаватт/соат учун 108,5 евродан 118,75 еврогача.

Шунингдек, 23 март кунги савдоларда Brent нефти ҳам қимматлашмоқда. Intercontinental Exchange маълумотларига кўра, Тошкент вақти билан соат 18:40 ҳолатига май ойидаги фючерслар бир баррель учун 120,5 долларни ташкил этган, бу нефть нархининг 4,3 фоизга ошганини кўрсатади.

Путиннинг сўзларига кўра, Россия расмийлари «ўз қадрини тўккан» валюталардан, жумладан, доллар ва евродан фойдаланишдан воз кечишни режалаштирмоқда. Ҳукумат ва Россия банки бир ҳафта ичида хорижий импортчилар Россиянинг ички бозорида рублни қандай сотиб олишлари ҳақида ўйлашлари керак.

«Россия газни шартномаларда кўрсатилган ҳажмлар, нархлар ва нарх тамойилларига мувофиқ етказиб беришда давом этади», — деди Путин.

Аввалроқ Германия ва Қатар газ бўйича узоқ муддатли ҳамкорликка келишиб олгани хабар қилинганди. Шунингдек, Германиянинг энг йирик энергетика компанияси Россиядан газ сотиб олишни тўхтатгани ҳақида хабар берилди.