Россияни иҳоталаш йўлида: Германия ва Қатар газ бўйича узоқ муддатли ҳамкорликка келишиб олди
Германия канцлери Олаф Шольц Россиядан энергия етказиб беришни тақиқлашга қарши чиққан.
Германия бош вазири ўринбосари ва иқтисодиёт вазири Роберт Хабек Қатар билан суюлтирилган газ етказиб беришни назарда тутувчи энергетика соҳаси бўйича ҳамкорликка келишиб олди. Бу ҳақда Die Welt хабар бермоқда.
Қайд этилишича, Ҳабек Қатар амири билан Доҳада бўлиб ўтган музокаралар чоғида узоқ муддатли энергия ҳамкорлик бўйича келишиб олган.
Вазирнинг таъкидлашича, энди компаниялар суюлтирилган газ етказиб бериш бўйича аниқ шартномалар тузиши керак. Йиғилишда RWE, E.ON ва Uniper каби концернлар вакиллари иштирок этди.
Иқтисодиёт вазирлиги раҳбари аввалроқ Германия кузгача Россия кўмиридан, 2022 йил охирига келиб эса Россия нефтидан деярли мустақил бўлиш ниятида эканини маълум қилган эди.
Вазир ҳозирда Германиянинг асосий мақсади мамлакатда суюлтирилган газ терминалларини қуриш эканини, Берлин эса Норвегия, АҚШ, Канада ва Қатар билан газ етказиб бериш бўйича музокаралар олиб бораётганини таъкидлади.
Бунгача Еврокомиссия етакчиси Урсула фон дер Ляйен Россия энергия ташувчиларни жадал рад этиш режаси тайёрланаётганини маълум қилган эди.
«Май ойи охиригача биз 2027 йилгача Россия гази, нефти ва кўмирига қарамликдан босқичма-босқич воз кечишни таклиф қиламиз. Бу зарур миллий ва Европа ресурслари томонидан қўллаб-қувватланади», — деди у.
Бироқ Европанинг айрим етакчилари, жумладан Германия канцлери Олаф Шольц Россиядан энергия етказиб беришни тақиқлашга қарши чиқди.