Германиянинг энг йирик энергетика компанияси Россиядан газ сотиб олишни тўхтатди
Компания директорининг айтишича, Россия бозори E.ON’нинг мақсадли ҳудуди эмас.
Германиянинг энг йирик энергетика компанияси E.ON Украинага ҳарбий ҳужум туфайли Россия етказиб берувчилардан табиий газ сотиб олишни тўхтатди. Бу ҳақда компания матбуот хизмати хабар берди.
«Биз газимизни Европадаги улгуржи бозорлардан сотиб оламиз. E.ON тўғридан-тўғри ишлаб чиқарувчилар билан узоқ муддатли таъминот шартномаларига эга эмас. Бироқ бизнинг портфелимиздаги табиий газнинг оз миқдори ‘Газпром’нинг Европадаги савдо компанияларидан сотиб олинган», — деди компания бош директори Леонард Бирнбаум.
Бирнбаум Россия бозори E.ON компаниясининг мақсадли ҳудуди эмаслигини таъкидлади. Март ойи бошида Германия канцлери Олаф Шольц мамлакат Россияни айланиб ўтиб газ сотиб олишни бошлаганини айтганди, бироқ етказиб бериш қаердан келаётганига аниқлик киритмади.
Маълумот ўрнида, E.ON компаниясининг «Шимолий оқим» газ қувури оператори Nord Stream AG’нинг 15,5 фоиз акцияларига эгалик қилади.
Аввалроқ Германия йил охиригача Россия нефтидан деярли мустақил бўлмоқчилиги хабар қилинганди. Шунингдек, Илон Маск АҚШни нефть ва газ қазиб олишни оширишга чақиргани ҳақида хабар берилди.
