Қозоғистон Европа Иттифоқига кўмир етказиб бериш ҳажмини икки бараварга оширди

Ойлик етказиб бериш 2022 йил бошида 140-200 минг тоннани, март ойидан бошлаб эса 300-400 минг тоннани ташкил этган.

Россия Украинага бостириб кирганидан сўнг Қозоғистон Европа Иттифоқига кўмир етказиб бериш ҳажмини икки баравар оширди. Бу ҳақда «Коммерсантъ» нашри хабар берди.

Қозоғистон 2022 йилнинг дастлабки беш ойида Европага бутун 2021 йилга нисбатан кўпроқ кўмир жўнатган. Ушбу маълумотларни Европа статистика хизмати бўлмиш Eurostat эълон қилди.

Ойлик етказиб бериш 2022 йил бошида 140-200 минг тоннани, март ойидан бошлаб эса 300-400 минг тоннани ташкил этган. 2021 йил апрель ва май ойларида Қозоғистоннинг Европа Иттифоқига кўмир экспорти 60-70 минг тоннага тенг бўлган.

Қозоғистон кўмирни Европа мамлакатларига асосан денгиз (2022 йил 782 минг тонна юборган ва ўтган йили эса 240 минг тонна), темир йўл (мос равишда 635 минг ва 540 минг тонна) ва автомобиль йўллари (90 минг ва 8,2 минг тонна) орқали етказиб беради.

«Умуман олганда, 2021 йил Қозоғистон 29,2 миллион тонна кўмир экспорт қилди, асосий харидорлар Россия (19 миллион тонна), Швейцария (4,8 миллион тонна) ва Беларусь (1,9 миллион тонна) бўлди», деб хабар берди Миллий статистика бюроси.

Тоғ-металлургия корхоналари уюшмаси раҳбари Николай Радостовец LS порталига берган интервьюсида денгизга чиқиш Қозоғистон учун кўмир етказиб беришнинг асосий шартига айланганини айтиб ўтган.

«Биз Россия ва Беларусь билан ягона умумий иқтисодий маконни ушбу давлатлар транзит ҳудудларидан денгизга чиқишимиз учун фойдаланиш мақсадида яратдик», — деган у.

Шу билан бирга, йилнинг биринчи чорагида Европа Иттифоқига кўмир етказиб беришнинг асосий қисми Россия ҳиссасига тўғри келган (51 фоиз).

«Россиялик трейдерлар 2021 йилнинг биринчи чорагига нисбатан сезиларли даражада пасайишига (минус 19 фоиз) қарамай, энг катта бозор улушига сақлаб қолди», — дейилади Eurostat’нинг чораклик ҳисоботида.

Худди шу чоракликда Қозоғистоннинг кўмир етказиб беришдаги улуши 2 фоиздан 3 фоизга ошди, АҚШ ҳиссаси эса 9 фоиздан 5 фоизга камайди.

Тахминан тўрт ой олдин, апрель ойи бошида Европа Иттифоқи давлатлари Россия кўмири импортига қарши чеклов чоралари қўллаш тўғрисида келишиб олди. Европа Иттифоқининг бешинчи санкциялар пакетига кўмир импорти тақиқи ҳам киритилди.

Қарорга кўра, 10 августдан бошлаб Европа Иттифоқи Россиядан кўмир ва бошқа қаттиқ ёқилғиларни сотиб олиш, импорт қилиш ва транзит ташишни тақиқлайди. Бунга қадар томонларга 9 апрелгача тузилган шартномаларни бажаришга рухсат берилади.

Брюссел маълумотларига кўра, чекловлар Россия барча кўмир импортининг чорак қисмидан кўпроғига таъсир қилади ва бу Россия ҳар йили тахминан 8 миллиард евро йўқотишига олиб келади.