Қозоғистон нефть маҳсулотларини автомобиль йўллари орқали экспорт қилишни тақиқлади
ОАВ Қозоғистонда бир йил давомида бензин 5 фоизга, дизель 42 фоизга қимматлашганини ёзганди.
Қозоғистон бензин, дизель ёқилғиси ва нефть маҳсулотларининг айрим турларини автомобиль йўллари орқали экспорт қилишни олти ойга тақиқлади. Бу ҳақда «Коммерсантъ» нашри ёзмоқда.
Маълум қилинишича, тегишли буйруқ мамлакат Энергетика, Ички ишлар, Молия вазирликлари ва Миллий хавфсизлик қўмитаси томонидан имзоланди.
Нефть маҳсулотларини автомобилнинг завод газ бакида, шунингдек, ҳажми 20 литрдан ортиқ бўлмаган идишларда экспорт қилиш мумкин. Бундан ташқари, мойлаш мойларини экспорт учун истисно қилинган. Буйруқ 12 июль, сешанба кунидан кучга киради.
Қозоғистон ҳукумати 2019 йилнинг ноябрь ойидаёқ нефть маҳсулотларини автомобиль транспортида экспорт қилишни вақтинчалик тақиқлаган эди. Шунга ўхшаш чора икки йил ўтиб, 2021 йилнинг ноябрида ҳам жорий қилинди. Тақиқ муддати 2022 йилнинг май ойида тугади.
ОАВ Қозоғистонда бир йил давомида бензин 5 фоизга, дизель 42 фоизга қимматлашганини ёзди.
Шу фонда мамлакат Энергетика вазирлиги чакана савдода сотиладиган нефть маҳсулотларининг маржинал нархларини ўзгартириш тўғрисида буйруқ тайёрлади. Хусусан, АИ-92 ва АИ-93 бензин нархини ошириш таклиф қилинмоқда.
Аввалроқ Саудия Арабистони Осиё учун нефть нархини оширгани ҳақида хабар берилганди.
Мавзуга доир:
