Тўғридан-тўғри инвестициялар жамғармаси қайта ташкил этилди
Тўғридан-тўғри инвестициялар жамғармаси Президент қарори билан МЧЖга айлантирилди. Компаниянинг устав капитали 1 млрд долларга етказилади.
Тўғридан-тўғри инвестициялар жамғармаси МЧЖга айлантирилди. «Ўзбекистон Республикасининг Тўғридан-тўғри инвестициялар жамғармаси фаолиятини такомиллаштириш чора-тадбирлари тўғрисида»ги Президент фармони қабул қилинди.
Фармонга мувофиқ «Тўғридан-тўғри инвестициялар жамғармасининг бошқарув компанияси» акциядорлик жамияти устав капитали 100 миллион долларга тенг «Ўзбекистон Республикасининг Тўғридан-тўғри инвестициялар жамғармаси» МЧЖ шаклидаги инвестиция компанияси сифатида қайта ташкил қилинди.
Инвестиция компаниясининг устав капитали 1 миллиард долларга етказилади.
Инвестициялар ва ташқи савдо вазири Инвестиция компаниясининг кузатув кенгаши раиси ҳисобланади.
Инвестиция компанияси инвестицияларни қуйидаги усуллар билан жалб қилади:
- кредит (қарз) олиш ва Инвестиция компаниясининг устав капиталига инвесторларнинг пул маблағларини жалб қилиш;
- юридик шахсларни ташкил этиш ёки уларнинг устав фондларида (устав капиталида), шу жумладан мол-мулк сотиб олиш йўли билан иштирок этиш;
- йирик институционал ва стратегик инвесторлар билан ҳамкорлик ўрнатиш, шу жумладан нуфузли халқаро молия марказларининг юрисдикцияларидан фойдаланиш.