Apple носоз клавиатуралар сабаб мижозларига 50 млн доллар тўлайди
Мижозлар Apple’ни судга бериб, компания функционал муаммолар ҳақида билганини, бироқ буни яширганини таъкидлади.
Apple эски MacBook’ларнинг носоз клавиатуралари бўйича суд ишини ҳал қилиш учун эллик миллион доллар тўлашга рози бўлди. Бу ҳақда Reuters нашри хабар бермоқда.
Apple 2015 йил янги механизм — «капалак»ни тақдим этди. Орадан кўп ўтмай, фойдаланувчилар клавиатурадаги тугмачаларнинг ёпишиши ва ишламай қолаётгани ҳақида гапира бошлади. Бундан ташқари, янги механизмни чанг ва бошқа элементлардан тозалаш қийин эди.
Мижозлар Apple’ни судга бериб, компания функционал муаммолар ҳақида билганини, бироқ буни яширганини таъкидлади. Apple MacBook’ларни расмий алмаштириш дастурини таклиф қилди, аммо янги клавиатуралар эскилари билан бир хил эди.
Компания 2019 йил охирида янгиланган клавиатура дизайнини тақдим этди, аммо бу пайтда мижозлар судга даъво аризаси киритиб бўлган эди.
Apple компенсация тўлашга рози бўлди, бироқ муаммо ҳақидаги маълумотни қасддан яширганини рад этди.
Келишув шартномаси 2015-2019 йилларда АҚШнинг еттита штати: Калифорния, Флорида, Иллинойс, Мичиган, Ню-Жерси, Нью-Йорк ва Вашингтонда MacBook, MacBook Air ва MacBook Pro’нинг аксарият моделларини сотиб олган мижозлар учун амал қилади.
Юристларнинг фикрича, клавиатурани бир неча марта алмаштирган кишиларга максимал 395 доллардан тўланади. Клавиатурани бир марта алмаштирганлар эса 125 доллардан олади, алоҳида тугмаларни тузатганларга 50 доллардан берилади. Харидорлар, шунингдек, қурилмани сотиб олгандан кейин тўрт йил давомида бепул таъмирлатиш ҳуқуқига ҳам эга бўлади.
Мижозларнинг вакили бўлган Girard Sharp ва Chimicles Schwartz Kriner & Donaldson-Smith адвокатлик фирмалари 15 миллион долларгача компенсация талаб қилишлари мумкин. Бу Apple томонидан тўланадиган умумий эллик миллион доллардан олиб қолинади.
Россиянинг Федерал антимонополия хизмати 19 июль куни Apple компаниясини мамлакатнинг монополияга қарши қонунчилигини бузган деб топди. Компания иловаларни ишлаб чиқиш бозоридаги ҳукмрон мавқейини суиистеъмол қилганликда айбланди.
Apple эндиликда 552 миллион рубль миқдоридаги жаримани тўлаши керак бўлади.